Blikar vinna hér risa sigur og eru þar af leiðandi jafnir Víkingum af stigum á toppi deildarinnar! Skýrsla og viðtöl koma seinna í kvöld.

Kristófer með skot fyrir utan teig sem fer framhjá markinu.

Það verða að minnsta kosti 5 mínútur í uppbót.

Patrik tekur spyrnuna aftur en í þetta skipti tekur veggurinn þetta og boltinn fer útaf í hornspyrnu.

Fred tekur skotið úr spyrnunni og boltinn skellur í þverslána. Það verður svo mikill darraðardans eftir það þar sem Framarar reyna að pota boltanum yfir línuna en þetta endar sem aukaspyrna fyrir Blika inn í eigin teig.

Fram fær aukaspyrnu rétt fyrir utan teig. Gott skotfæri.

Damir fer niður og heldur um bakið, þarfnast aðhlynningar.

Flott spil hjá Blikum við vítateig Framara. Aron leggur boltan fyrir Höskuld sem tekur virkilega flotta snertingu til að halda boltanum niðri. Þeir ná hinsvegar ekki alveg að búa sér til færi úr þessu.

Alex virðist alveg sárþjáður og þarf börur til að fara af velli. Leiðinlegt að sjá.

Blikar fá aukaspyrnu á mjög góðum stað rétt fyrir utan teig. Alex sem braut af sér er svo eitthvað þjáður og þarf aðhlynningu.

Höggi reynir skotið úr spyrnunni og boltinn fer næstum undir vegginn, en tærnar á veggnum náðu að blokka þetta.

Flott spil hjá Fram hér. Boltinn fer yfir til Haralds á vinstri kant sem reynir fyrirgjöf beint í varnarmenn og þeir fá horn. Það kemur svo ekkert úr því horni.

Framarar með tvær breytingar í hálfleik. Bóndinn entist bara einn hálfleik í sínum fyrsta leik hjá þeim.

Skemmtilegur hálfleikur að baki og liðin eru jöfn. Blikarnir byrjuðu hálfleikinn vel og voru að pressa gestina stíft. Framarar komu sér hinsvegar vel inn í leikinn í seinni og hefðu í raun átt að skora annað. Fáum vonandi meira af þessu í seinni.

+4 Andri Rafn liggur nú í grasinu og þarfnast aðhlynningar. Veit ekki hvað gerðist þarna en vonandi er í lagi með hann. Hann töltir allavega aftur inná.

+2 Framarar fara upp hinumegin og Kennie fær boltan miðsvæðis fyrir utan teig. Hann lætur bara vaða og það er fast en rétt framhjá.

+1 Góð fyrirgjöf frá Blikum eftir horn og Viktor er aleinn á fjærstönginni. Hann reynir að teygja sig í boltan en er bara einhverjum sentimeter frá því að komast í hann.

Það verða að minnsta kosti 3 mínútur í uppbótartíma.

Þvílík kooooonfekt sending inn fyrir vörnina hjá Fred. Hann einfaldlega tekur alla varnarmenn úr leik með þessari sendingu og Magnús er einn gegn markmanni. Magnús er þá bara algjör flækjufótur, kemur ekki boltanum nægilega undan sér og er á endanum bara með lélegt skot. Svona sending verðskuldar mark.

Breiðablik vinnur boltan ofarlega á vellinum. Ísak er fljótur að hugsa og lyftir boltanum í hlaupaleiðina hjá Aroni sem er að spretta inn á teig. Hann á þá bara slúttið eftir en hann beinir boltanum hátt yfir markið.

Blikar beinskeyttir upp vinstri kantinn þar sem Davíð kemur með góða fyrirgjöf fyrir markið. Aron er á hinum endanum á þessari sendingu inn í teig þar sem hann nær skotinu en það rúllar rétt framhjá markinu.

Blikar hafa byrjað þennan leik betur, pressa vel á Framara og eru að skapa nokkur hálf færi. Framarar virka þó hættulegir á breikinu.

Haraldur tekur stutt horn á Fred sem lætur hann fá boltan strax aftur áður en Haraldur kemur með fyrirgjöfina. Greinilega eitthvað af æfingasvæðinu en Haraldur var bara í rangstöðu. Illa farið með fast leikatriði.

Damir er með boltan rétt fyrir utan eigin vítarteig og reynir afleita sendingu til baka aftur á Anton. Djenairo er svo fljótur af stað að reyna að ná þessum bolta en Anton er örlítið fljótari og er rétt á undan í þennan bolta. Þarna var Damir næstum bara búinn að gefa gestunum mark.

Breiðablik 4-3-3 Anton Andri - Damir - Viktor - Kristinn J Höskuldur - Arnór - Kristinn S Aron - Ísak - Davíð Fram 5-3-2 Ólafur Alex - Kennie - Kyle - Þorri - Haraldur Gustav - Orri - Fred Djenairo - Magnús

Blikar með góða sókn strax í byrjun. Davíð Ingvars leggur boltan fyrir Kidda Steindórs esem á skot í varnarmann og aftur fyrir. Blikar taka svo hornið og halda mikilli pressu á Framara. Ná einhverjum þremur góðum skotfærum á þá, en Framarar gera vel í að koma sér fyrir skotin.

Twana flautar leikinn af stað og það eru Framarar sem taka upphafssparkið.

Halldór Árnason þjálfari Breiðabliks gerir eina breytingu á liði sínu frá síðasta leik þegar þeir sigruðu Val á útivelli. Viktor Karl Einarsson meiddist í þeim leik og er því ekki í hóp, Arnór Gauti Jónsson kemur inn í liðið fyrir hann. Rúnar Kristinnsson þjálfari Fram gerir tvær breytingar á sínu liði eftir að þeir töpuðu 1-0 fyrir ÍA í síðustu umferð. Guðmundur Magnússon og Freyr Sigurðsson fá sér sæti á bekknum en inn fyrir þá koma Magnús Þórðarsson og nýji maðurinn Gustav Bonde Dahl. Gustav er miðjumaður frá Danmörku sem skrifaði undir hjá félaginu síðasta miðvikudag.

Aron Jóhannsson leikmaður Aftureldingar leit í kristalkúlu sína fyrir þessa umferð og spáir svona fyrir þessum leik. Breiðablik 1 - 1 Fram Vonbrigðaleikur umferðarinnar þar sem bæði lið fjarlægjast markmiðin sín.

Maðurinn með flautuna í þessum leik verður Twana Khalid Ahmed og honum til aðstoðar verða Ragnar Þór Bender og Guðmundur Ingi Bjarnason. Eftirlitsmaður er Gunnar Jarl Jónsson og fjórði dómari er Gunnar Oddur Hafliðason.

Fram er í spennandi baráttu um að tryggja sér að vera í efri hlutanum þegar kemur að skiptingu deildarinnar. Það eru aðeins 4 leikir til stefnu og eins og er þá er Fram í 6. sæti. Stjarnan og KA sem eru í næstu sætum fyrir neðan spiluðu gegn hvoru öðru í gær og gerðu þar jafntefli. Með sigri í dag gætu Framarar því búið til smá bil milli sín og þeirra. Pakkinn er gríðarlega þéttur og ef úrslitin falla rétt fyrir þeim gætu þeir farið upp í 4. sætið. Í síðustu umferð fóru Framarar upp á Skaga þar sem þeir töpuðu fyrir ÍA 1-0. Viktor Jónsson gerði mark Skagamanna í þeim leik. Rúnar Kristinsson þjálfari Fram.

Breiðablik situr í 2. sæti deildarinnar og eru 3 stigum á eftir topp liði Víkings. Víkingar eiga leik gegn ÍA í kvöld á sama tíma þannig ef úrslitin falla með Blikum geta þeir komist í efsta sætið. Breiðablik hefur verið á góðu skriði upp á síðkastið, og eru taplausir í síðustu 5 leikjum. Þeir áttu síðast leik síðastliðinn fimmtudag gegn Val sem þeir unnu 2-0 þar sem Jakob Franz Pálsson skoraði sjálfsmark og Ísak Snær Þorvaldsson skoraði seinna mark Breiðabliks.

Góða kvöldið og verið velkomin í beina textalýsingu frá leik Breiðabliks gegn Fram í 19. umferð Bestu deild karla. Leikurinn hefst klukkan 19:15 og verður spilaður á Kópavogsvelli.