Breiðablik fá eitt gott færi rétt fyrir leiks lok sem fer í stöngina. En ungverjinn flautar þennan leik af. Viðtöl og skýrsla koma inn á síðuna í kvöld. Þangað til næst, takk fyrir mig.

Agla María tekur spyrnuna inn á teiginn sem FC Minsk verjast mjög vel.

Vallarþulur Blika tilkynnir mann leiksins sem er að sjálfsögðu Katrín Ásbjörnsdóttir. Þrenna og stoðsending!

Viktoriya Tikhan kemst skyndilega ein í gegn og nær fínu skoti á markið sem Telma ver aftur fyrir í horn. Telma búinn að þurfa að verja núna tvisvar sinnum í seinni hálfleik mjög vel.

Lonica Tsanwane á skot í fyrsta sem Telma ver stórglæsilega í þverslána. Þetta kom bara gjörsamlega upp úr engu!

Leikurinn hefur róast. Það hefur verið mjög lítið um almennileg færi í þessum seinni hálfleik. Meira bara um að halda í boltann. Blikar hafa greinilega róað tempóið niður líka. Margar breytingar og það á greinilega ekki að vera að sprengja sig í þessum seinni hálfleik.

Samantha tekur spyrnuna inn á teiginn sem Minsk-konur skalla frá.

Samantha með skot inni á teignum sem er varið aftur fyrir í horn!

Minsk hefja hér leik á ný!

Ungverjinn bætir engu við. Mjög góð frammistaða hjá Breiðablik í fyrri hálfleik og þær leiða með þremur mörkum þegar liðin ganga til búningsklefa. Tökum okkur korterspásu og mætum svo til baka að vörmu spori!

Heiða Ragney tekur aukaspyrnu frá miðju sem fer í þverslána. Katrín Ásbjörns er þá vakandi og nær frákastinu sem Alena nær þó að verja.

Vigdís Lilja fær boltann inni á teignum, snýr og tekur skot sem fer í stöngina og út í innkast. Það sáu allir þennan bolta inni!

Samantha tekur spyrnuna inn á teiginn sem Heiða Ragney skallar yfir.

Í dag eru leikmenn Breiðabliks með sorgarbönd til minningar um Bryndísar Klöru sem lést á dögunum á Landspítalanum eftir stunguáras á menningarnótt.

Samantha Smith með alls ekki galna tilraun af löngu færi sem fer yfir.

Barbára Sól kemur með góðan bolta inn á teiginn sem ratar á Katrínu Ásbjörns. Hún skallar hins vegar boltann rétt yfir markið. Þarna átti hún að gera betur!

Vigdís Lilja tekur spyrnuna inn á teiginn sem Heiða skallar í átt að markinu en hvíta rússarnir hreinsa.

Heiða Ragney kemur með góða sendingu í gegn á Katrínu sem er í baráttu við Kristinu. Kristina gerir vel í að komast í boltann og Katrín nær ekki að gera sér mat úr þessu.

Dziyana Bakum vinnur boltann á miðjum vellinum og keyrir af stað. Hún kemur með góða sendingu í gegn á Daniel Cuta Cidalia sem er komin ein á móti Telmu en skotið hennar fer framhjá. Þarna slapp Breiðablik með skrekkinn. Einn sofandaháttur og svona getur gerst!

Vigdís Lilja með annaðhvort sendingu eða slakt skot sem fer ratar ekki á markið. Katrín Ásbjörns er mætt fyrir markið og nær snertingu áður en boltinn fer útaf en hún nær ekki að stýra boltanum á markið. Blikarnir byrja þetta af krafti!

Miðað við hvernig þessi leikur hefur byrjað verður þetta göngutúr í garðinu hjá Breiðablik. Þær liggja í færum á meðan Minsk-konur komast ekkert í boltann. Stefnir í stóran sigur með þessu áframhaldi en við bíðum og sjáum.

Það er Vigdís Lilja sem á upphafssparkið. Blikarnir leika í sinni hefðbundni grænu treyju, hvítu stuttbuxum og hvítu sokkum. Minsk leika í treyjum frá Jako sem er bleik og grá, gráum stuttbuxum og gráum sokkum.

Þá ganga liðin og dómarar leiksins til vallar og klappa í átt að áhorfendunum.

Nik Chamberlain, þjálfari Breiðabliks, gerir enga breytingu frá 4-0 sigrinum gegn Víking Reykjavík á dögunum. Enda afhverju að breyta sigurliði? Samkvæmt UEFA stilla Blikar sér upp í 4-3-3 en það er líklegt að þær verði í 4-1-2-1-2 í leiknum. Svona stillir UEFA Blikaliðinu upp: Telma er áfram í markinu; Kristín Dís, Elín Helena, Ásta Eir (fyrirliðinn) og Barbára Sól spila saman í fjögurra manna vörn; Andrea Bjarna, Heiða Viðars og Karítas Tómasar eru saman á miðjunni; Vigdís Lilja, Katrín Ásbjörns og Samantha Smith eru fremstu þrjár. Líkt og áður sagði byrjar leikurinn klukkan 19:00 og fer fram á Kópavogsvelli.

Dómarateymið kemur bæði frá Ungverjalandi og Ítalíu. Hún Katalin Sipos verður á flautunni í kvöld en hún kemur frá Ungverjalandi. Samlandi hennar, Laura Emerencia Szabó, og ítalinn, Veronica Martinelli, verða Katalinu til halds og trausts. Deborah Bianchi er fjórði dómari en hún kemur frá ítalíu.

Andstæðingar Breiðabliks koma frá Hvíta Rússlandi og spila á vellinum FC Minsk Stadium sem tekur 2000 manns. Félagið keppti upphaflega í hvítrússnesku úrvalsdeildinni sem Minchanka-BGPU áður en það varð til kvennaliðið FC Minsk árið 2010. Árið 2011 unnu þær landsbikarinn, sinn fyrsta titil, og skömmu síðar komust þær upp í efsta sæti deildarinnar. Árið 2013 unnu þær meistaratitilinn í fyrsta skipti og vann einnig alla 26 leiki deildarinnar ásamt öðrum bikarnum. Þetta tryggði liðinu þátttökurétt í Meistaradeild kvenna í fyrsta skipti. Árið 2014 tókst félaginu að vinna tvöfalt aftur.

Þegar einn leikur er búinn af Bestu deildinni eftir tvískiptinguna er Breiðablik á toppnum þar sem þær unnu Víking Reykjavík en Valur gerði jafntefli gegn Þrótti. Núna leika þær risaleik gegn hvíta rússneska liðinu FC Minsk í forkeppni Meistaradeildar kvenna. Það verður skemmtilegt og áhugavert að fylgjast með Blikunum spila í kvöld.

Heilir og sælir ágætu lesendur og veriði hjartanlega velkomin í þessa þráðbeinu útsendingu fré leik Breiðabliks og FC Minsk í forkeppni Meistaradeildar kvenna. Leikurinn byrjar klukkan 19:00 og fer fram á Kópavogsvellinum.