SKÝRSLAN: Yfirburðar sigur Eyjamanna á Grindavík
Hvað réði úrslitum?
Heildar leikur liðsins var mjög góður, þéttleiki, vinnusemi og skorað úr færum. Það var ekki að sjá á ÍBV að þeir væru að fara að gefa eitthvað eftir þegar toppsætið er í húfi enda bættu þeir alltaf um betur og skoruðu í heildina 6 mörk án þess að fá einhverja alvöru pressu frá Grindvíkingum.
Bestu leikmenn
1. Oliver Heiðarsson
Var alltaf ógnandi og vinnusemin upp á 10. Það dró aldrei af honum, hann hljóp, pressaði og ógnaði allan leikinn og skoraði eitt mark í þessum stórsigri. Langar að sjá kílómetrastöðuna hans eftir leikinn.
2. Hermann Þór Ragnarsson
Má alveg deila 1. sætinu með Oliver, ekki hægt að gera upp á milli þeirra. Skoraði tvö mörk og var oft á köflum að verjast vel líka. Var mjög vinnusamur og gafst aldrei upp. Þeir tveir áttu frábæran leik.
Atvikið
ÍBV liðið í heild gaf aldrei færi á sér og náðu að opna vörn Grindavíkur upp á gátt. Vinnusemin og þrautseigjan kom þeim áleiðis og þeir ætluðu aldrei að hætta að skora eftir fyrsta markið.
Hvað þýða úrslitin?
ÍBV er í dauðafæri að koma sér upp í Úrvalsdeildina en það er aðeins ein umferð eftir af fótboltasumrinu.
Vondur dagur
Lið Grindavíkur í heildina. Fjöldi marka sem liðið fékk á sig talar sínu máli, það er erfitt að fara inn í hálfleik 4-0 undir og þurfa að rífa sig í gang.