SKÝRSLAN: Mjög lélegt
Hvað réði úrslitum?
Wales mættu út í seinni hálfleikinn og voru aggresífari og það var meiri orka í þeim. Íslenska liðið var ekki nógu samstillt varnarlega og sóknarlega sem gerði eiginlega gæfumuninn í dag.
Bestu leikmenn
1. Lúkas Petterson
Enginn útileikmaður skaraði fram úr. Lúkas var flottur í markinu og átti nokkrar stórar vörslur sem hélt okkur inni í þessu.
2. Óskar Borgþórsson
Kemur inn á og skorar. Hefði mátt koma fyrr inn á ásamt Benoný Breka. Saknaði Davíð Snæ líka í þennan sóknarleik.
Atvikið
Í seinni hálfleik átti Joe Low, fyrrum leikmaður Walsall, að fá rautt spjald fyrir olnobgaskot á Hilmi að mínu mati. Boltinn lengst frá honum og bara algjör óþarfi.
Hvað þýða úrslitin?
Ísland er núna 5 stigum á eftir Wales og Danmörku og möguleikarnir eru orðnir allt í einu mjög litlir.
Vondur dagur
Hvar á ég að byrja. Mér fannst bæði lið bara arfaslök í fyrri hálfleiknum. En maður sá það strax í upphafi síðari hálfleiks hvaða lið var mætt til leiks. Wales tóku forystuna fljótlega og fengu fullt af færum til að skora. Á fyrsta korteri seinni hálfleiksins áttum við þrjú skot sem fóru út í Kópavog, annars vorum við frekar bitlausir fram á við. Ef ég á að velja einn myndi ég taka Hlyn Frey. Mér fannst hann ströggla í dag og sérstaklega í öðru markinu og færi rétt á undan. Barnalegur varnarleikur.
Dómarinn - 6
Það komu kaflar sem hann dæmdi leikinn ekki vel. Ísland átti að fá vítaspyrnu í fyrri hálfleik og mér fannst Joe Low átt að fá rautt spjald í seinni hálfleiknum. Annars fannst mér hann dæma þetta heilt yfir bara fínt fyrir utan eitt og eitt atvik.