SKÝRSLAN: Keflvíkingar sendu ÍR-inga á bænastund
Hvað réði úrslitum?
Skilvirkur sóknarleikur og hæfileikinn að nýta mistök andstæðingsins. Lið ÍR kom af gríðarlegum krafti inn í leikinn og tilfinninginn var að þeir ætluðu sér að hafa þetta þó á hnefanum yrði. Keflvíkingar lentu undir í baráttunni og leið ekki vel á vellinum. Eftir um kortersleik fór þó heldur að draga saman með liðunum og gestirnir úr Keflavík fundu taktinn. Nýttu sér ákefð ÍR til hins ítrasta og refsuðum þeim fyrir þeirra mistök. Heilt yfir mjög sanngjarn sigur Keflvíkinga sem geta farið sáttir heim með gott veganesti fyrir síðari leikinn.
Bestu leikmenn
1. Frans Elvarsson
Yfirburðarmaður á vellinum. Það skipti engu hvort það var að vera fremsti maður í pressu eða falla djúpt og verjast áhlaupum ÍR. Alltaf var Frans á staðnum. Yfirferð og vinnsla upp á 10 og fordæmi sem sönnum fyrirliða sæmir. Hans besti leikur í sumar hvað mig varðar og það á hárréttu augnabliki.
2. Kári Sigfússon
Sá heldur áfram að vera drjúgur. Tvö mörk og virkilega skeinuhættur fram á við í liði Keflavíkur. Strákur sem fær stórt tækifæri með því að koma til Keflavíkur og er svo sannarlega að grípa það.
Atvikið
Rautt og víti á Axel Inga. Atvik sem hefði getað breytt öllu um útlit þessa einvígis. Komum betur að því hér ögn síðar.
Hvað þýða úrslitin?
Keflavík er með tögl og haldir í einvíginu og í frábærri stöðu fyrir seinni leik liðanna á sunnudag. ÍRingar liggja á bæn og biðja um kraftaverk því ekkert minna dugar þeim.
Vondur dagur
Axel Ingi Jóhannesson.... Í stöðunni 4-1 lætur hann reka sig út af og fær dæmt á sig víti þó boltinn sé víðsfjarri fyrir að slá til sóknarmanns ÍR. Gjörsamlega glórulaus ákvörðun hjá þessu unga leikmanni með unninn leik í höndunum að kasta slíkri líflínu til ÍRinga. Prísar sig sælann að vítið fór forgörðum en svona kjánaskapur á hreinlega ekki að sjást og vonandi að hann læri af því.
Dómarinn - 7
Frábær dómgæsla og hárrétt ákvörðun að vísa Axel af velli og dæma vítaspyrnu. Slepptu reyndar nokkuð augljósri vítaspyrnu á ÍR í fyrri hálfleik er brotið var á Kára Sigfússyni innan teigs. Að öðru leyti vel dæmdur leikur sem fékk að fljóta nokkuð vel.