SKÝRSLAN: Hörmung fyrir varnarmenn en hágæða skemmtun
Hvað réði úrslitum?
Svakalega opinn, skemmtilegur og sveiflukenndur leikur þar sem allt var morandi í varnarmistökum. Valsmönnum mistókst að landa sigrinum þrátt fyrir að KR hefði lent í áföllum og Vesturbæingar voru með mjög laskað lið.
Bestu leikmenn
1. Jóhannes Kristinn Bjarnason - KR
Skoraði fallegasta mark leiksins og jöfnunarmarkið hádramatíska af vítapunktinum.
2. Jónatan Ingi Jónsson - Valur
Mark og stoðsending frá honum í dag. Patrick Pedersen skoraði tvö og hefði getað verið í þessum dálki líka. Einnig Luke Rae sem skoraði og lagði upp.
Atvikið
Brot Hólmars þegar komið var yfir uppgefinn uppbótartíma og Helgi Mikael benti á punktinn.
Hvað þýða úrslitin?
Stór vonbrigði hjá Val miðað við aðstæður og þróun leiksins að landa ekki öllum stigunum. Vonbrigði ofan á vonbrigði fyrstu umferðar. KR-ingar halda áfram að spila stórskemmtilega en gera svo urmul af mistökum og eru galopnir til baka.
Vondur dagur
Hér getum við nefnt ýmsa varnarmenn. Orri Sigurður, Gyrðir og Finnur gerðu allir hrikaleg mistök en Hólmar Örn Eyjólfsson átti versta daginn. Þó brotið í lokin hafi verið fyrir utan teiginn er glórulaust hjá honum að bjóða upp á þetta. Fyrirliðinn sendur í sturtu og Valur missti af mikilvægum sigri. Þá var varnarleikur hans í leiknum arfadapur.
Dómarinn - 4
Vítaspyrnan sem KR fékk í blálokin átti að vera aukaspyrna og þá átti hann að gefa Tryggva Hrafni rautt spjald.