SKÝRSLAN: Þægilegur Þróttar sigur í blíðunni á Avis
Hvað réði úrslitum?
Engin spilar betur en andstæðingurinn leyfir er gamall frasi sem á eflaust vel við eftir leik eins og þennan. Þróttur byrjaði leikinn á því að stíga hátt á lið FH sem bar ávöxt strax í upphafi leiks þegar Freyja Karin skoraði eftir rétt tæpar þrjár mínútur. Vörn FH riðaði þá strax til falls og gekk Þróttur á lagið. Þær gáfu varnarmönnum FH engan tíma á boltann sem endaði oftar en ekki með því að þær unnu boltann og komu sér í færi. Eitthvað sem liði FH tókst ekki að leysa fyrr en alltof seint og úrslitin svo gott sem ráðin.
Bestu leikmenn
1. Freyja Karín Þorvarðardóttir
Iðin í pressunni þann tíma sem hún spilaði. Vann boltann margoft á vallarhelmingi FH og skoraði þessu utan tvö mörk. Prýðisleikur hjá Freyju sem að er heldur betur að springa út í upphafi móts.
2. Þórdís Elva Ágústsdóttir
Gríðarlegur kraftur í Þórdísi í leiknum. Gott auga fyrir spili og tímasetur hlaup sín inn á teiginn gríðarlega vel.
Atvikið
Mark Þórdísar þar sem hún spólar sig í gegnum vörn FH í teignum og skorar glæsilega úr þröngu færi stendur upp úr fyrir mig.
Hvað þýða úrslitin?
Þróttur heldur í við Breiðablik á toppi deildarinnar stigalega séð. -Sitja í öðru sæti með 16 stig en talsvert lakari markatölu en Blikar.
FH áfram í þriðja sæti með 13 stig.
Vondur dagur
Fyrri hálfleikurinn hjá liði FH var frekar skrýtin og þá einna helst varnarlega. Þær voru mjög gjafmildar í öftustu línu á þessum fallega sólardegi og sannarlega sjálfum sér verstar. Bætti ekki úr skák að fyrirliði þeirra Arna Eiríksdóttir þurfti að yfirgefa völlinn vegna meiðsla á hné. Það er vonandi að þau meiðsli séu ekki alvarleg og komi ekki til með að halda henni frá vellinum í langan tíma.
Dómarinn - 7
Guðmundur og hans teymi áttu fínan dag á vellinum að mínu mati. Liðin tókust alveg vel á á köflum en dómarar leiksins komust vel frá sínu og án þess að hægt sé að benda á einhver stór atvik sem þeir klikkuðu á.