SKÝRSLAN: Pedersen skaut Valsmönnum á Laugardalsvöll
Hvað réði úrslitum?
Stjarnan var mun betra liðið í upphafi leiks og uppskáru eftir því. Leikurinn var opinn og skemmtilegur áhorfs, þar sem bæði lið fengu gommu af færum, þá sérstaklega í fyrri hálfleik. Það sem leið á leikinn tóku Valsmenn hann fastari tökum og að lokum uppskáru sanngjarnan 3-1 sigur.
Bestu leikmenn
1. Patrick Pedersen
Það má ekki koma dauður bolti á hann í teignum og þá er hann búinn að skora, magnaður leikmaður sem skaut Valsmönnum í úrslitaleikinn.
2. Kristinn Freyr Sigurðsson
Kristinn frábær í dag, sýndi gamla takta í öðru markinu sem hann skapaði upp á sínar eigin spýtur.
Atvikið
Það er eflaust þegar Árni Snær brýtur á Albin Skoglund rétt fyrir utan teig Stjörnumanna. Valsmenn vildu sjá rautt spjald á Árna, en Stjörnumenn gult spjald fyrir dýfu.
Hvað þýða úrslitin?
Valur mætir annaðhvort Vestra eða Fram í úrslitaleik Mjólkurbikarsins sem fer fram þann 22. ágúst.
Vondur dagur
Árni Snær Ólafsson, markvörður Stjörnunnar hefur tvímælalaust átt betri daga, mér finnst hann líta afar skringilega út í fyrstu tveimur mörkum Valsmanna. Þá var vörn Stjörnunnar ekki upp á marga fiska en Sindri og Þorri hafa sömuleiðis báðir átt betri daga.
Dómarinn - 4
Jóhann Ingi og tríóið voru því miður ekki með allt í teskeið í dag. Þeir leyfðu þó leiknum að fljóta sem ég er alltaf hrifinn af. En mikið af pjúrabrotum sem voru ekki dæmd og öfugt. Í umdeildu atviki þegar Árni Snær tekur Skoglund niður, er samkvæmt minni vitneskju ekki hægt að dæma bara gult. Þar sem að Árni er aftasti maður og Jóhann flautar á brot þá finnst mér óskiljanlegt hvers vegna þetta er þá ekki rautt. Það er þó annað mál hvort að þetta hafi verið brot yfir höfuð (sem mér sýndist þó í fljótu bragði).