SKÝRSLAN: Besta deildin stendur undir nafni
Hvað réði úrslitum?
Leikurinn var fremur lokaður framan af. Valsarar ógnuðu aftur fyrir Víkinga og kom fyrra mark þeirra nákvæmlega úr þeirri stöðu. Rauða spjald Ingvars setti þá auðvitað strik í reikninginn og gerði Víkingum erfitt fyrir. Þeir byrjuðu þó seinni hálfleikinn betur og jöfnuðu. Valsmenn rönkuðu þá við sér og var leikurinn nokkuð jafn eftir það. Víkingar væru eðlilega sáttir með stigið úr því sem komið var. En á 89. mínútu er klaufagangur í vörn þeirra og boltinn dettur fyrir Patrick Pedersen í teignum, það þarf ekki að spyrja að því hvernig það endaði og stigin þrjú Valsmanna.
Bestu leikmenn
1. Kristinn Freyr Sigurðsson
Enginn áberandi bestur í dag, en Kristinn Freyr var duglegur í barningnum á miðjunni og átti frábæra stoðsendingu.
2. Tarik Ibrahimagic
Besti maður Víkinga í dag, líkt og Kristinn duglegur á miðjunni og átti jafnframt frábæra stoðsendingu í marki Víkinga.
Atvikið
Auðvitað rauða spjaldið, en svo reyndist klaufagangur í vörn Víkinga einstaklega dýr þar sem Patrick Pedersen refsaði og sigurinn Valsmanna.
Hvað þýða úrslitin?
Þrjú lið eru jöfn á toppi deildarinnar með 30 stig, Valsmenn þó efstir á markatölu, Víkingur í öðru og Breiðablik í þriðja með lökustu markatöluna af liðunum þremur.
Vondur dagur
Ingvar Jónsson fær þessa nafnbót fyrir að vera rekinn út af og setja liðsfélaga sína í ansi erfiða stöðu. Ingvar keyrði Jónatan Inga niður og ekkert annað hægt en að dæma rautt á hann.
Dómarinn - 9
Einstaklega vel dæmdur leikur, erfiðar ákvarðanir sem kvartettinn nelgdi allar. Kom þó upp atvik sem ég sá ekki á vellinum, þar sem varnarmaður Víkings á að hafa blakað boltanum með hendinni. Þar sem ég sá þetta ekki og allar aðrar stóru ákvarðanirnar voru réttar fá þeir níu í einkunn, hótuðu tíunni meira að segja.