SKÝRSLAN: Keflavík er alltaf Keflavík í Keflavík þó þú sért frá Njarðvík
Hvað réði úrslitum?
Njarðvíkingar réðu lögum og lofum í fyrri hálfleiknum þó án þess að ná að koma inn marki. Leikurinn jafnaðist í seinni hálfleik og varð mun jafnari. Það voru svo heimamenn sem náðu fyrsta högginu og fylgdu því eftir stuttu seinna með öðru marki. Njarðvíkingar náðu aðeins að klóra í bakkann í restina en lengra fór það ekki og Keflavík hafði betur.
Bestu leikmenn
1. Nacho Heras
Var flottur í varnarlínu Keflavíkur í dag. Hafði góð tök á leikmönnum Njarðvíkinga inn í teig og skilaði flottu verki í dag.
2. Frans Elvarsson
Akkeri á miðju Keflavíkur. Var öflugur þar í baráttunni og náði að stýra miðjunni vel.
Atvikið
Markið frá Eiði Orra Ragnarssyni braut ísinn og virtist vanka Njarðvíkinga. Tilfinningin var alltaf þannig að fyrsta markið myndi hafa mikið að segja og það reyndist raunin.
Hvað þýða úrslitin?
Keflavík heldur í vonina um að komast í umspilið með sigrinum í dag. Njarðvíkingar horfa á eftir sárum stigum í baráttunni um fyrsta sætið.
Vondur dagur
Almo kom sér oft í flottar stöður en klappaði boltanum allt of mikið og klúðraði þessum stöðum jafn snögglega og hann vann þær. Hefði viljað sjá meira frá honum í dag.
Dómarinn - 6
Ekki slæmt en ekkert frábært heldur. Nokkur atvik og atriði sem hægt er að taka til en ekkert sem hafði nein úrslitaáhrif.