SKÝRSLAN: Breiðablik er Íslandsmeistari 2025 (Staðfest)
Hvað réði úrslitum?
Það var bara kominn tími á það að Breiðablik myndi tryggja sér titilinn og maður hafði það á tilfinningunni allan leikinn að það myndi gerast, jafnvel þó svo að Víkingar kæmust tvisvar yfir. Blikaliðið var betra liðið lengst af og vann verðskuldaðan sigur að lokum sem tryggði þeim verðskuldaðan Íslandsmeistaratitil.
Bestu leikmenn
1. Birta Georgsdóttir (Breiðablik)
Hefur verið stórkostleg í sumar og gerir sterkt tilkall í það að vera besti leikmaður mótsins. Skoraði tvö mörk og var stórhættuleg í sóknarleik Blika.
2. Samantha Smith (Breiðablik)
Keyrði sóknarleik Breiðabliks áfram. Það var mikill kraftur í henni í kvöld og hún ætlaði sér að vinna þennan leik. Maður hugsar að hún sé ekkert að eiga það sérstakt tímabil út frá því hversu ótrúleg hún var í fyrra en það er bara bull. Hún er búin að vera frábær í sumar.
Atvikið
Það er auðvitað bara sigurmarkið sem Berglind Björg skorar. Auðvitað var það hún líka, markadrottningin. Og svo fagnaðarlætin eftir leik þegar flugeldum var skotið á loft. Skemmtilegt.
Hvað þýða úrslitin?
Breiðablik er Íslandsmeistari 2025, annað árið í röð sem þær vinna þennan titil. Ekki nóg með það, þá eru þær líka bikarmeistarar. Langbesta lið landsins. Víkingar geta horft jákvæðum augum á þennan leik en þær eru að berjast um fjórða sætið.
Vondur dagur
Ashley Jordan Clark fékk dauðafæri undir lokin til að jafna metin en tókst ekki að skora. Þetta var ekki alveg hennar dagur fyrir framan markið. Mér fannst líka Bergdís Sveinsdóttir ekki alveg finna taktinn en ef hún hefði gert það, þá hefði þessi leikur mögulega endað öðruvísi.
Dómarinn - 8
Mér fannst dómarateymið bara dæma þennan leik vel. Ekkert brjálæðislega stórar ákvarðanir sem þurfti að taka en þau voru með góð tök að mínu mati.