Ekki sekúndu bætt við. Íslenska liðið sá takmarkað til sólar í kvöld og sigurinn er fyllilega sanngjarn gegn liði sem við áttum litla möguleika gegn. Margt sem við getum lært af leik kvöldsins og vonandi er þetta varða á þeirri vegferð sem liðið er á. Ljósu punktarnir eru að Linda Líf Boama er komin á blað með landsliðinu. Viðtöl úr Laugardal eru væntanleg.

2517 áhorfendur lögðu leið sína á Laugardalsvöll í kvöld.

Hætta í teig Íslands og boltinn liggur í netinu. Búið að dæma brot á Ednu Imade fyrir klafs í teignum svo það telur ekki.

Bonmati að leika listir sínar úti til hægri, setur boltann fyrir markið þar sem boltinn hrekkur af Örnu í átt að marki en Ceci rétt nær að slá boltann frá áður en hann fer yfir línuna.

Aitana Bonmatí með skalla að marki eftir horn en boltinn beint á Cecilíu.

Karólína Lea með skot úr þröngu færi sem Spánverjar komast fyrir. Ísland fær horn.

Íslenska liðið verið mun ákveðnara í sínum aðgerðum í síðari hálfleik heldur en þeim fyrri, pressan að mörgu leyti verið markvissari og liðið "þorað" meira.

Alexia Putellas fær langan tíma til að athafna sig í teignum eftir sókn Spánar og nær að endingu skotinu. Setur það sem betur fer yfir markið.

Ísland vinnur boltann strax eftir innkastið. Linda Líf finnur Karólínu í teignum sem reynir skotið en setur boltann rétt framhjá stönginni.

Innkast dæmt af Íslandi þar sem Sædís var of lengi að athafna sig.

Þurfum að þora að pressa þær Spænsku almennilega þegar þær eru á boltanum. Höfum engu að tapa. Erum að gefa þeim alltof stór svæði fyrir aftan bakverðina okkar og á milli hafsenta og miðju til að spila í.
Við getum spilað mun betri varnarleik enn þetta og við vitum það.

— Orri Rafn Sigurdarson (@OrriRafn) June 9, 2026

Spánverjar ráðið lögum og lofum á vellinum og leiða verðskuldað. Ísland á engan hátt ráðið við leik þeirra í fyrri hálfleik enda Spánn sýnt afhverju þær eru besta lið í heiminum í dag. En við þurfum að gera betur varnarlega klárlega, þær eru að fá of mikin tíma og pláss og hafa refsað fyrir það.

Sandra María tapar boltanum klaufalega og Spánverjar bruna upp, Sandra keyrir það eina rétta og keyrir á eftir þeim og brýtur til að stöðva skyndisókn. Vinnusemin til fyrirmyndar þar að vanda.

Fínn kafli Íslands sem heldur boltanum lengur en fyrr í leiknum. Sóknin endar með skoti frá Alexöndru af talsverðu færi sem fer framhjá markinu.

Patri með skot eftir enn eina sóknarlotu Spánar. Úr ágætri stöðu í D-boganum en setur boltann yfir markið.

Alexia Putellas með tilraun að markið eftir darraðardans í teig Íslands, setur boltann framhjá afturfyrir sig af stuttu færi.

Salma Paralluelo með skot eftir hraða sókn Spánar, Glódís mætt og kemur sér fyrir skotið.

Spánn fær aukaspyrnu á fínum stað eftir að Karólína Lea brýtur á Patri. Vantar ekki spyrnugetuna í þetta spænska lið. Sending inn á teiginn en Sandra María skallar boltann frá.

Vicky López að ógna, með skot úr teignum en Cecilía ver og heldur boltanum.

Salma Paralluelo í dauðafæri í markteignum eftir sendingu frá Vicky, nær boltanum eftir fyrirgjöf og setur boltann á markið en Cecilía vandanum vaxin og ver vel.

Yfirburðir Spánar miklir úti á velli og lið Íslands lítið náð að "klukka" þær varnarlega til þessa í leiknum.

Salma Paralluelo í hörkufæri í teignum en Diljá rennir sér fyrir skot hennar. Spánn fær hornspyrnu. Hornið tekið stutt, Vicky Lopez með boltann við vinstra vítateigshorn og reynir sendingu inn á teiginn sem hafnar í fangi Cecilíu.

Ekki byrjunin sem íslenska liðið vonaðist eftir.

Vicky López í prýðis skotfæri í D-boganum á teig Íslands, velur að senda boltann frekar út á væng og setur of mikið púður í sendinguna sem fer afturfyrir. Þær spænsku mega taka svona ákvarðanir í allt kvöld.

Þetta er farið af stað í Laugardal. Það er Ísland sem hefur hér leik og Karólína Lea sparkar þessu af stað. Áfram Ísland!

Bæði kvenna og karlalandslið Íslands eigast við ríkjandi heimsmeistara í leikjum sínum núna með nokkra klukkustunda millibili. Stelpurnar eigast þá auðvitað við lið Spánar sem hefst eftir skamma stund! Strákarnir okkar hins vegar mæta Argentínu í vináttulandsleik í Auburn Alabama klukkan 01:00 á íslenskum tíma.

Steini þjálfari gerir tvær breytingar á liðinu sem lagði Úkraínu að velli á föstudaginn. Diljá Ýr Zomers og Ída Marín Hermannsdóttir koma inn fyrir Emilíu Kiær Ásgeirsdóttur og Hildi Antonsdóttur sem setjast á bekkinn. Byrjunarlið: 1. Cecilía Rán Rúnarsdóttir (m) 3. Sandra María Jessen 4. Glódís Perla Viggósdóttir (f) 6. Ingibjörg Sigurðardóttir 8. Alexandra Jóhannsdóttir 9. Diljá Ýr Zomers 10. Karólína Lea Vilhjálmsdóttir 17. Ída Marín Hermannsdóttir 18. Guðrún Arnardóttir 19. Sædís Rún Heiðarsdóttir 20. Thelma Karen Pálmadóttir

View this post on Instagram

A post shared by Knattspyrnusamband Íslands (@footballiceland)

Fyrri leikur liðanna fór fram í Castellon þann 3. mars sl. þar sem Spánverjar fóru með 3-0 sigur af hólmi. Clàudia Pina gerði þá fyrsta mark leiksins undir lok fyrri hálfleiks eftir umdeilt atvik. Hún bætti svo við öðru marki sínu í seinni hálfleik áður en Edna Imade rak smiðshöggið og innsiglaði 3-0 sigurinn. Íslenska liðið var þétt varnarlega og átti Cecilía hverja meistaravörsluna á fætur annarri. Hins vegar var lítið að frétta í sóknarleiknum og spilaðist leikurinn mikið til á vallarhelmingi Íslands. Spánn sigraði England 4-0 á dögunum og koma því inn í þennan leik sjóðheitar. Það mun því mæða mikið á öftustu línu Íslands ef ekki á illa að fara.

Lokaleikirnir í riðlinum fara fram á sama tíma klukkan 19:00 í kvöld. Ísland tekur á móti Spáni á Laugardalsvelli á meðan England mætir Úkraínu.Fyrir leiki kvöldsins er staðan í riðlinum svona: Spánn - 12 stig England - 12 stig Ísland - 6 stig Úkraína - 0 stig Íslenska liðið hefur þegar tryggt sér 3. sæti riðilsins, með sigrinum á Úkraínu, í síðasta leik. Það breytir engu hvað gerist í kvöld, Ísland fer beint í umspilsleiki í haust þar sem mætt verður liði úr C-deild Þjóðadeildarinnar um sæti á HM í Brasilíu. Fyrir Spánverja er hins vegar allt undir en þær eru jafnar Englandi að stigum á toppi riðilsins en með betri markatölu. Spánn verður því að vinna í kvöld til að tryggja sér HM-sætið beint ef England vinnur Úkraínu. Sarina Wiegman, þjálfari Englands, viðurkenndi í gær að hún muni fylgjast stressuð með því hvað gerist hér í Reykjavík!

Dómararnir í dag koma frá Slóvakíu Með flautuna í dag er Miriama Bocková, henni til halds og trausts eru Miroslava Pastoreková og Martina Ukropova aðstoðadómarar. Fjórði dómari í kvöld er svo Zuzana Valentová

Verið hjartanlega velkomin í þráðbeina textalýsingu beint frá Laugardalsvelli þar sem stelpurnar okkar taka á móti heimsmeisturum Spánar. Leikurinn hefst á slaginu 19:00!