Alvöru skemmtun sem við fengum í þessum seinni hálfleik og það leit allt út fyrir að Þróttarar væru að fara að stela þessu. Blikakonur héldu út og endurheimta toppsætið. Viðtöl og skýrsla detta inn seinna í kvöld, ég þakka fyrir mig.

Skyndisókn Blika en Mist stoppar Öglu löglega þegar hún nálgast teiginn og Agla brýtur á Mist í leiðinni. Stuðningsmenn Þróttar gefa henni gott klapp.

Þremur mínútum bætt við.

Aukaspyrna rétt fyrir utan vítateig Blika. Tekið stutt og þaðan kemur sending á fjær þar sem Jelena er óvölduð en skotið framhjá.

Hornspyrna inn í teiginn og Agla nær valdi á boltanum. Hún á skotið sem smellur í stönginni.

Sendingin kemur inn á Kayle á hárréttum tíma. Hún er sloppin ein í gegn en Taylor ver mjög vel frá henni. Dauðafæri.

Mist gerir mjög vel og kemur með frábæran bolta inn á teiginn þar sem Kayla skallar í netið en flaggið á loft.

Bríet Fjóla með fínasta skot utan teigs eftir hornspyrnu en skotið framhjá markinu.

Það hefur færst hiti í þetta. Hraði, tæklingar og köll. Það er spennandi hálftími framundan.

Þórdís Elva með hörkuskot rétt framhjá markinu eftir góðan undirbúning Öglu Maríu.

Þórdís Nanna sólar Blikakonu upp úr skónum, köttar svo inn og kemur með hættulegan bolta inn í teiginn en Blikar skalla í horn.

Það er að komast jafnvægi á þetta aftur eftir öfluga byrjun Blika í þessum seinni hálfleik.

Bríet Fjóla með mjög gott skot en skotið rétt framhjá stönginni. Taylor var ekki vel staðsett svo það mátti ekki miklu muna.

Gestirnir byrja þennan seinni hálfleik af miklum krafti.

Blikar sparka seinni hálfleik af stað!

Þorfinnur flautar til hálfleiks hér. Ekki skemmtilegasti hálfleikur sem ég hef séð en Blikar leiða líklegast sanngjarnt. Þróttarar hafa fengið sín færi úr föstum leikatriðum á meðan Blikar hafa verið duglegri að skapa sér færi. Tökum okkur korter!

Einni mínútu bætt við þennan fyrri hálfleik.

Fyrirgjöf kemur inn í teiginn en skalli Kaylu Rollins framhjá markinu.

Aukaspyrna á fínum fyrirgjafastað fyrir Blika en heimakonur hreinsa frá.

Mist gerir vel og sendir á Unni inn í teignum sem nær hörkuskoti en skotið beint á Taylor.

Aukaspyrna í fyrirgjafastöðu hjá Þrótti og aftur verður skothríð í átt að marki en Blikakonur halda út og koma boltanum frá.

Blikar hafa heilt yfir verið sterkari aðilinn þennan fyrri hálfleik.

Agla dansar með boltann fyrir utan teiginn og á svo fyrirgjöfina á Hrafnhildi en skotið yfir markið. Sendingin mögulega í óþægilegri hæð fyrir Hrafnhildi.

Góð hornspyrna Sæunnar inn í teiginn og Blikar í veseni að koma boltanum frá. Taylor handsamar boltann á endanum.

Hættuleg fyrirgjöf frá Úlfu dís sem er aðeins of innarlega fyrir Öglu en sóknin heldur áfram og Hrafnhildur komin í færi í teignum en skotin enda í horni. Þær taka það stutt en skapa sér ekkert úr því.

Fyrsta almennilega færi leiksins.

Agla María nærri því búin að stela boltanum af Mollee sem var aðeins kærulaus á boltanum. Boltinn hrekkur aftur á Mollee sem losar hann á samherja.

Mist í fínni stöðu við endalínu en sendingin inn í teiginn ratar ekki á samherja.

Þetta hefur farið rólega af stað, bæði lið að finna fyrir sér.

Kayla sparkar þessu af stað!

Jóhann gerir þrjár breytingar frá jafnteflinu gegn Þór/KA. Bríet Fjóla Bjarnadóttir, Sierre Marie Lelii og Þórdís Nanna Ágústsdóttir koma inn í liðið. Björg Gunnlaugsdóttir, Sigríður Theódóra Guðmundsdóttir og fyrirliðinn Álfhildur Rósa Kjartansdóttir setjast á bekkinn.

Ian Jeffs gerir tvær breytingar frá tapinu gegn ÍBV. Edith Kristín Kristjánsdóttir og Sunna Rún Sigurðardóttir tylla sér á bekkinn. Inn á koma Katelyn Duong og Úlfa Dís Kreye Úlfarsdóttir.

Helena Ólafsdóttir sérfræðingur og þáttastjórnandi Bestu markanna á Sýn sport spáir heimasigri í dag. Fyrir leikina tvo sem spilaðir eru í kvöld hefur hún spáð öllu rétt svo það verður spennandi að sjá hvort hún nái 5/5.

“Þróttarar þurfa að tryggja sig frá neðri hlutanum og mæta Blikum eftir að þær hafa verið að vinna yfirvinnu síðustu daga eins og FH líka. Þróttarar munu taka þennan leik og tryggja sæti í efri hluta deildarinnar“

Fyrri viðureign liðanna á tímabilinu var jafnframt fyrsti leikur deildarinnar. Edith Kristín Kristjánsdóttir og Hrafnhildur Ása Halldórsdóttir skoruðu virkilega flott mörk með stuttu millibili undir lok fyrri hálfleiks en mörkin urðu ekki fleiri og 2-0 sigur Blika staðreynd.

Sjáðu allt það helsta úr leiknum.

Blikakonur hafa tapað síðustu tveimur leikjum sínum, 2-0 gegn Stjörnunni og 2-1 gegn ÍBV. Þar á undan höfðu þær unnið fimm í röð.

Blikar sitja í öðru sæti deildarinnar með 36 stig, einu stigi á eftir FH sem hrifsaði toppsætið af þeim með 2-1 sigri á Þór/KA. Blikum nægir jafntefli í dag til þess að endurheimta toppsætið og fá heimavallarréttinn í toppslagnum eftir skiptingu.

Þróttarar hafa verið á góðu skriði síðustu vikur. Þær hafa ekki tapað leik síðan 20. júlí og þær eru ósigraðar í síðustu fimm. Tveir sigrar og þrjú jafntefli. Í síðustu umferð gerðu þær markalaust jafntefli gegn Þór/KA hér í Laugardalnum.

Þróttarar sitja í 5. sæti, jafnar að stigum við Grindavík/Njarðvík og Fram í 6. og 7. Sæti með 22 stig. Það er því enn tölfræðilega mögulegt að heimakonur endi í neðri helmingnum en þá þurfa þær að þola tólf marka tap í dag, svo efri helmingurinn er svo gott sem gulltryggður.

Þorfinnur Gústaf Þorfinnsson verður með flautuna í kvöld. Ásgeir Viktorsson og Kristinn Freyr Victorsson verða með flöggin, fjórði dómari verður Milan Djurovic og dómaraeftirlitsmaður kvöldsins verður Sigurður G Friðjónsson.

Leikurinn er hluti af tíundu umferð deildarinnar en umferðinni var frestað vegna EM u19 sem var haldið fyrr í sumar.

Umferðin:

5. september
ÍBV 2-3 Fram
6. september
FH 2-1 Þór/KA
Grindavík/Njarðvík 1-4 Valur
7. september
Stjarnan - Víkingur (19:15)
Þróttur - Breiðablik (19:15)

Verið velkomin kæru lesendur í þessa þráðbeinu textalýsingu frá leik Þróttar og Breiðabliks í öðrum af lokaleiknum fyrir skiptingu.