Þeir eru ákaflega vel að sigrinum komnir og fagna eðlilega vel og innilega hér í leikslok!

Takk fyrir mig!

Skallagrímsmenn fá aukaspyrnu inná miðjum vallarhelmingi Hamranna. Hleypa þeir lífi í þetta?

Svarið er nei. Aukaspyrna Carlos er vægast sagt ömurleg.

Carlos í fínasta skotfæri, en lúðrar boltanum himinhátt yfir. Hamrarnir eru að sigla þessu!

Ver frá Ara Styrmi af POINT BLANK færi! Risavarsla!

Alex Máni á þéttingsfast skot eftir sendingu frá Rúnari en Kristján ver vel í markinu.

Carlos á ágætis aukaspyrnu lengst utan af velli, en hún fer framjá marki Hamranna.

Eftir stórglæsilegan undirbúning Alex Mána, þá fær Rúnar Freyr boltann rétt fyrir utan teig Skallagríms. Hann klippir inn á vinstri fótinn og hamrar boltann í stöng og framhjá!

Ver fyrst langskot Almars og hefði líklega getað gert betur, en boltinn dettur beint fyrir fætur Ísaks Einarssonar. Ísak stýrir boltanum á markið, en Ævar ver glæsilega úr algjöru dauðafæri!

Boltinn dettur fyrir hann inná teig Hamranna, en skot hans fer langt yfir!

Kemst aftur fyrir vörn Skallagríms, en er í þröngu færi þegar hann lætur vaða og Kristján ver í horn!

Skallagríms menn fá horn.

Hún fer aftur fyrir endamörk.

Tómas Ernir gerir vel inná teig Skallagríms og rennir boltanum á Kára. Hann fær galopið skot en setur boltann í nærstöngina. Þetta hefði endanlega klárað þetta!

Hleypur af sér alla vörn Hamranna, en Ævar kemur vel út á móti og ver í horn. Þetta var færi!

Leikmenn Skallagríms leita leiða til þess að komast aftur inn í leikinn, en hingað til hefur vörn Hamranna einfaldlega ekki boðið upp á opnanir.

Þeir eru brjálaðir við Sigurð Hjört, en honum verður ekki haggað og heldur smá fund með liðsmönnum.

Mér sýnist engar breytingar hafa verið gerðar í hálfleik, en því skal tekið með örlitlum fyrirvara - áfram gakk!

Hamrarnir leiða með tveimur mörkum gegn engu í hálfleik og eru vel að forystunni komnir. Þeir hafa verið áræðnari, fengið betri opnanir og stýrt leiknum alveg skínandi vel.

Sjáumst að vörmu!

Vopnfirðingurinn Sigurður Donys Sigurðsson, þjálfari Hamranna, lék sumarið 2007 með Skallagrími. Þar skoraði hann 3 mörk í 7 leikjum.

Skoraði mörk í gulu og grænu, en skoraði flest í appelsínugulu.

Hamrarnir virka heldur betur þægilegir með sitt tveggja marka forskot og Skallagrímsmönnum gengur brösuglega að opna þétta vörn þeirra.

Reynir Skorri fær boltann ca. 20 metrum fyrir utan vítateig Hamranna og lætur vaða. Ævar misreiknaði flug boltans eitthvað og var alveg límdur við gervigrasið, en honum til happs þá fer skotið rétt framhjá markinu!

Þá fá Borgnesingar horn.

Óliver Jóhannsson hreinsar frá, en Skallagrímur heldur boltanum.

Marinó Bjarni gerir gríðarlega vel í að vinna boltann ofarlega á vinstri kantinum og kemur í kjölfarið með frábæra fyrirgjöf inná teig Skallagríms. Þar mætir Gauti, aleinn og yfirgefinn, en honum tekst ekki að stýra boltanum á markið!

Lúkas Viktorsson reynir marktilraun úr ágætis skotfæri, en hittir boltann illa og hann fer langt framhjá marki Hamranna.

Sjóðheitir Hamramenn fá hornspyrnu. Leikmenn Skallagríms virðast slegnir - eðlilega.

Önnur in-swing spyrna frá Marinó, en Hamrarnir ná ekki að gera sér mat úr þessu.

Liðin þreifa á hvoru öðru og mikil barátta. Hamrarnir verið meira með boltann, en við bíðum eftir fyrsta færinu.

Örlitlir tæknilegir örðugleikar að eiga sér stað við að koma byrjunarliðum hér inn, en þau koma von bráðar.

Kári Gunnarsson er tekinn niður stuttu fyrir utan vítateig Skallagríms, en Siggi Þrastar segir honum að standa í lappirnar. Þetta virkaði blatant brot, en jæja!

Þá fá Skallagrímur horn.

Lúkas Viktorsson vinnur aukaspyrnu fyrir Borgnesinga úti á vinstri kantinum. Ná Skallagrímsmenn að koma sér aftur inn í þetta?

Hamramenn fá fyrstu hornspyrnu leiksins.

Marinó reynir að skrúfa hana á fjær, en hún er heldur föst og flýgur aftur fyrir endamörk.

Marinó Magnason á fyrsta skot leiksins, en það er laust og framhjá markinu.

Heimamenn koma þessu af stað!

Leikmenn takast í hendur og vonandi fáum við frábæran leik í sólskininu á VÍS vellinum!

Hamramenn áttu ekki í nokkrum einustu vandræðum með að klára sinn B-riðilinn, en það voru Stokkseyrarmenn sem að veittu þeim helst samkeppni um efsta sætið. Liðið skoraði ekki jafn mikið og eldheitir Borgnesingar, en Hamrarnir skoruðu 41 mark og fengu á sig 20. Þar var einn af stofnendum Hamranna, hinn síungi Gunnar Þórir Björnsson, markahæstur með 6 mörk. Markaskorun liðsins dreifðist því afar bróðurlega.

Í undanúrslitum voru Smári andstæðingur Hamranna og úr varð hörkueinvígi. Fyrri leikur liðanna fór fram í Kópavogi og eftir að Tómas Veigar Eiríksson hafði komið Hömrunum yfir með glæsilegum skalla, þá tókst Smáramönnum að snúa leiknum á haus og leiddu 2-1 - þar til að Gunnar Þórir jafnaði leikinn úr öruggri vítaspyrnu og fóru því Akureyringar með sterkt jafntefli norður fyrir seinni leikinn.

Vel var mætt á seinni leik liðanna á Greifavellinum og og stemningin flott. Það var Tómas Ernir Guðmundsson sem að kom Hömrunum yfir áður en Heiðar Ingi Þórsson jafnaði metin fyrir Smára. Því var 1-1 að loknum 90 mínútum og þurfti að framlengja.
Allt ætlaði svo um koll að keyra þegar að Gauti Snær Einarsson, betur þekktur undir listamannsnafninu Gauti Guðmann kom heimamönnum í 2-1. Gleðin varð ekki minni þegar að Helgi Már Þorvaldsson kom heimamönnum í 3-1 á 113. mínútu. En það fór líklegast aðeins um menn þegar að Mikael Breki Salmon minnkaði muninn í 3-2 á 120. mínútu, en nær komust Smári ekki og Hamramenn fögnuðu innilega í leikslok þegar sæti í 4. deild var tryggt.

Hamrarnir fagna því annað árið í röð að fara upp um deild, en liðið vann Utandeildina á síðustu leiktíð.

Borgnesingar áttu í harðri baráttu við Smáramenn um efsta sætið í A-riðli deildarinnar og hirtu það á markatölu. Að 14 leikjum loknum hafði liðið skorað 63 mörk og fengið á sig 20.

Hlutskarpastur í liði Skallagríms var hinn tvítugi Sveinn Svavar Hallgrímsson, en hann skoraði 12 mörk í 11 leikjum fyrir liðið. Alejandro Serralvo Gomez skoraði þá 8 mörk í 4 leikjum, sem verður að teljast ágætis tölfræði hjá Spánverjanum.

Skallagrímsmenn mættu svo liði Stokkseyrar í undanúrslitum, en Stokkseyri lenti í 2. sæti B-riðils. Þeir töpuðu fyrri leik liðanna á Stokkseyrarvelli 2-1, en sneru hlutunum sér í vil á heimavelli.

Það var þó torsótt. Borgnesingar komust í 2-0, þökk sé mörkum frá Alejandro Serrallo Gomez og Ara Styrmi Almarssyni og virtust ætla að sigla heim glæsilegum endurkomusigri án áfalla, en fengu mark í andlitið á 94. mínútu og þurfti því að framlengja. Þar reyndust heimamenn eiga meira í tankinum og mörk frá Snorra Kristleifssyni og Carlos Javier Castellano tryggðu 4-1 sigur og sæti í 4. deild klárt.

Hér mun fara fram textalýsing á úrslitaleik 5. deildar karla. Þar etja kappi Hamrarnir frá Akureyri og Skallagrímur og er von á hörkuleik.

Bæði lið hafa nú þegar tryggt sér sæti í 4. deild að ári, en það er bikar í boði og menn tilbúnir að selja sig ansi dýrt til þess að koma höndum á dolluna.