Lestu um leikinn: Víkingur R. 0 -  0 ÍA

„Við komum hérna í Víkina og erum að spila á móti mjög vel spilandi Víkingsliði sem er með unga og spræka stráka og hafa verið að gera frábæra hluti, hafa verið að skora mikið af mörkum og við ætluðum okkur að vera þéttir og halda skipulagi,“ sagði Jóhannes Karl Guðjónsson, þjálfari ÍA.

Víkingar fengu vítaspyrnu undir lok fyrri hálfleiks þegar Árni Snær Ólafsson markvörður ÍA gerðist brotlegur gegn Nikolaj Hansen. Hansen fór sjálfur á punktinn en Árni bætti fyrir mistök sín og varði slaka spyrnu danans. Tónn Jóhannesar hefði væntanlega verið annar ef úr hefði orðið mark?

„Nei ég hefði ekki verið sáttur við það en ég bara skil ekki hvernig þeir fengu það út að þetta væri víti. Árni kemur út og ætlar að grípa boltann en missir hann og í sama augnabliki keyrir leikmaður Víkinga bara í markmanninn og menn hlaupa saman og dómarinn ákveður að dæma víti.“

Félagaskiptaglugginn opnaði í dag og hafa Skagamenn þegar sótt einn leikmann. Á Jóhannes von á frekari breytingum á hópnum?

„Við erum bara að vinna í að þróa okkur. Við erum að vinna eftir ákveðinni stefnu og höldum okkur alveg við það og ef það finnst einhver leikmaður sem passar inní okkar framtíðaráform er aldrei að vita nema það bætist eitthvað í hópinn.“

Sagði Jóhannes Karl en allt viðtalið má sjá hér að ofan.