Óskar Örn Hauksson, einn besti leikmaður í sögu efstu deildar, hefur mikið þurft að sitja á bekknum hjá Stjörnunni á þessari leiktíð.
Hann var fenginn til Stjörnunnar fyrir leiktíðina eftir að hafa verið gríðarlega mikilvægur hluti af liði KR í mörg ár. Það var búist við því að hann yrði lykilmaður í Stjörnunni en svo hefur ekki verið.
Óskar Örn, sem er 37 ára, hefur mikið þurft að sitja á bekknum. Hann byrjaði á bekknum er liðið gerði 2-2 jafntefli gegn Víkingi um verslunarmannahelgina.
Hann kom svo inn á og átti stóran þátt í fyrra marki Stjörnunnar í leiknum.
Eftir leik var Ágúst Gylfason, þjálfari Stjörnunnar, spurður að því hvort það væri ekki erfitt að halda leikmanni eins og Óskari - sem er með eins stóra ferilskrá - ánægðum þegar hann er ekki að spila.
„Nei, Óskar er alltaf ánægður og alltaf brosandi. Hann er toppmaður," sagði Gústi.
„Hann er frábær í fótbolta, kemur inn á og breytir aðeins leiknum. Hann er með frábæra eiginleika og mikil gæði."
Mun hann fá að byrja eitthvað á næstunni? „Það er erfitt að segja. Það er hörð barátta í liðinu. Það er frábært að hafa svona öflugan hóp."
Óskar var orðaður við FH í félagaskiptaglugganum sem lokaði á dögunum. Stjarnan ákvað að halda í hann og mun hann því allavega klára tímabilið í Garðabænum. Hann er enn með mikil gæði eins og hann sýndi er hann kom inn á í leiknum á móti Víkingi.
Athugasemdir