Eftir tap gegn Þýskalandi eru landsmenn að velta því fyrir sér hvernig Ísland getur komist á HM.
Stelpurnar hefðu tryggt sér farseðilinn til Frakklands með sigri á Þýskalandi, jafntefli hefði leyft okkur að vera með örlögin í höndum okkar en tap gerir okkur erfitt fyrir.
Ísland mætir Tékklandi á þriðjudag í leik sem skiptir öllu máli.
Sindri Sverrison, blaðamaður á Morgunblaðinu, skrifaði grein um möguleika Íslands eftir tapið gegn Þýskalandi áðan.
Það er ljóst að tap gegn Tékklandi þýðir það að HM, draumurinn er úti. Tékkar fara þá upp í annað sætið á innbyrðis viðureignum, en það myndi ekki duga Tékkum í umspil.
Jafntefli myndi halda Íslandi í öðru sæti en ekki er endilega ljóst að það dugi í umspil.
Í umspilið fara fjögur lið með besta árangurinn í öðru sæti, í undanriðlunum sem eru sjö talsins. Íslandi dugar jafntefli gegn Tékklandi ef að Belgíu, sem er í öðru sæti sjötta undanriðils, tekst ekki að vinna topplið Ítalíu á heimavelli. Staðan í 1. og 7. undanriðli er nefnilega þannig að liðin sem eru í öðru sæti þar munu ekki geta ógnað Íslandi. Möguleikinn er því ágætur á að jafntefli dugi til að fara í umspilið, en ekki öruggur.
„Það er aftur á móti enn líklegra, afskaplega líklegt, að sigur á Tékklandi dugi til að fara í umspilið. Til að hann dugi ekki þarf allt að falla á móti Íslandi í fjórum riðlum. Belgía þarf þá að vinna Ítalíu með meiri mun en Ísland vinnur Tékkland, Danmörk og Svíþjóð að gera jafntefli í toppslag 4. riðils, Hollandi að mistakast að vinna Noreg í 3. riðli, og Skotland og Sviss að sleppa við töp gegn lakari andstæðingum í 2. riðli," skrifar Sindri.
Það er því bara langbest að vinna Tékkland. Við getum kvatt fyrsta sætið; Þýskaland mun taka það. Þýskaland mætir Færeyjum og það þarf stórslys fyrir Þýskaland til þess að vinna Færeyjar ekki.
Tékkland er sýnd veiði en ekki gefin. Liðið er mjög sterkt, en fyrri leikurinn út í Tékklandi endaði með jafntefli, 1-1. Ísland komst yfir í þeim leik en Tékkar jöfnuðu. Smelltu hér til að lesa nánar um leikinn í Tékklandi.
Athugasemdir