Svenni er markvörður og í þriðja sæti í goggunarröðinni á Hlíðarenda. Hann gekk í raðir Vals í fyrra og hefur aðeins spilað tvo keppnisleiki, báða í bikar, síðan þá.

Svenni, sem er fæddur 1995, hóf ferilinn hjá Stjörnunni og þótti mikið efni. Auk þess að eiga 10 leiki að baki með Stjörnunni í efstu deild á hann leiki fyrir yngri landslið Íslands. Hann spilaði einn leik fyrir U19 og einn fyrir U21.

Hann hefur þó aðeins einu sinni verið með byrjunarliðssæti í meistaraflokki hér á landi, þegar hann varði mark Fjarðabyggðar í Inkasso-deildinni hálft sumarið 2016.

Hannes Þór Halldórsson hefur verið aðalmarkvörður Vals í sumar. Anton Ari Einarsson hefur þurft að sætta sig við bekkjarsetu á meðan.