01.12.22 - 19:42
Jóhann Þór Hólmgrímsson
Neuer orðinn leikjahæsti markvörðurinn í sögu HM
Mynd: EPA
Mynd: EPA
Manuel Neuer markvörður þýska landsliðsins er að leika sinn 19. landsleik á HM en hann er í rammanum gegn Kosta Ríka þessa stundina.
Enginn markvörður hefur leikið jafnmarga leiki á HM en hann fór framúr landa sínum Sepp Maier og Brasilíumanninum Claudio Taffarel sem léku 18 leiki.
Þetta er fjórða heimsmeistaramótið sem hann tekur þátt í en það fyrsta var árið 2010 í Suður Afríku. Þýskaland fór alla leið í undanúrslit þá en tapaði gegn Spánverjum. Liðið vann Úrúgvæ í leiknum um þriðja sætið.
Í Brasilíu fjórum árum síðar stóðu Þjóðverjar uppi sem sigurvegarar. Þessi 36 ára gamli markvörður hefur leikið 116 landsleiki á ferlinum.
