Heimska, vanræksla og þörf á endurnýjun. Þessi orð eru notuð af spænskum fjölmiðlum sem eru reiðir eftir tap spænska landsliðsins gegn Rússum í 16-liða úrslitum HM.
Fjallað er um brottrekstur Julen Lopetegui rétt fyrir mót, rangt liðsval Fernando Hierro og að liðið sé gamalt. Fjölmiðlar kenna mörgum þáttum um það hvernig fór.
Fyrirsögnin á forsíðu Marca er einföld og köld: „Á heimleið" og sagt að það hafi verið barnalegt að halda að brottrekstur þjálfarans myndi ekki hafa neinar afleiðingar.
Lopetegui var rekinn fyrir það með hvaða hætti hann var í viðræðum við Real Madrid og var svo kynntur sem þjálfari liðsins fyrir mót.
„Liðið vann aðeins einn leik og frammistaðan var léleg á lykilstundum. Að skella skuldinni á lélega frammistöðu í vítaspyrnukeppni er of mikil einföldun og ódýr afsökun. Rétt eins og það er að skella skuldinni alfarið á Fernando Hierro," segir í umfjöllun Marca.
El Mundo segir að Hierro hafi verið hugmyndalaus og liðið hafi skort allan hreyfanleika í sóknarleiknum. El Pais segir að spænska liðið hafi verið byrjað að hrynja áður en flautað hafi verið til leiks í Rússlandi og niðurstaðan í raun fyrirsjáanleg.
Athugasemdir