„Þetta var bara allt í lagi frammistaða, við héldum vel í boltann en Slóvakarnir spiluðu þéttan varnarleik. Stundum hefðum við kannski getað spilað boltanum hraðar til að opna þær fyrr en sem betur fer nýtti Elín færið sitt. Við fengum 3 stig í dag en hefðum getað verið betri á köflum, “ sagði Dagný Brynjarsdóttir eftir 1-0 sigur gegn þéttu liði Slóvakíu á Laugardalsvelli í kvöld.
Lestu um leikinn: Ísland 1 - 0 Slóvakía
„Mér fannst þær ósköp svipaðar og Ungverjaland en kannski aðeins skipulagðari í sínum varnarleik, þéttari og erfiðara að opna þær.“
Ísland átti í erfiðleikum með að skapa færi þrátt fyrir að vera mun meira með boltann í leiknum.
„Við vissum allan tímann þegar við fórum inn í þennan leik að við þyrftum að vera þolinmóðar og nýta færin þegar þau myndu koma. En við höfðum allan tímann trú á því að við myndum skora. “
Þrátt fyrir að Slóvakarnir væru ekki mikið með boltann komust þær í eitt álitlegt færi undir lok leiksins í stöðunni 1-0.
„Það fór alveg gæsahúð um mann, maður var alveg svolítið stressaður þegar hún komst þarna ein á móti markmanni en það fór ekki inn þannig maður þarf ekki að pæla í því lengur.“
Sif var ekki í leikmannahóp Íslands í kvöld þar sem faðir hennar, Atli Eðvaldsson lést eftir erfið veikindi fyrr í dag. Dagný viðurkenndi að dagurinn hefði verið erfiður.
„Við ákváðum það í dag þegar við fórum út á völlinn að við myndum spila fyrir Sif og fjölskyldu hennar og ég er bara ánægð að við gátum unnið í dag,“ sagði Dagný að lokum.
Viðtalið má sjá í spilaranum hér að ofan.
Athugasemdir