Dregið var í riðlakeppni fyrir undankeppni EM 2020 við hátíðlega athöfn í Dublin núna í hádeginu.

Ísland mun leika í H-riðli með Frakklandi, Tyrklandi, Albaníu, Moldavíu og Andorra. Það er því ljóst að ansi löng ferðalög bíða íslenska liðinu og stuðningsmönnum.

Ísland mætti Frökkum í vináttulandsleik í október mánuði sem endaði með 2-2 jafntefli. Liðin mættust síðan í 8-liða úrslitum á Evrópumótinu árið 2016 þar sem að Franska liðið reyndist alltof stór biti fyrir það íslenska og lauk leiknum með 5-2 sigri Frakklands sem fór alla leið í úrslitin.

Það þarf svo valla að nefna það en liðið vann Heimsmeistarakeppnina í Rússlandi í sumar.

Íslenska liðið þekkir það tyrkneska ágætlega en þessi lið voru einmitt saman í riðli fyrir undankeppni HM. Ísland vann báða leikina nokkuð sannfærandi, 0-3 á útivelli og 2-0 á Laugardalsvelli. Liðin voru líka saman í riðli fyrir undankeppni EM.

Albanía og Ísland mættust í undankeppninni fyrir HM árið 2014 en Ísland hafði betur í báðum leikjunum, 2-1.

Moldavía og Ísland hafa aldrei mæst áður í A-landsliðsleik í knattspyrnu. Moldóvía er í 170. sæti heimslistans og hafa ekki unnið leik í síðustu tveimur undankeppnum.

Ísland og Andorra hafa þrisvar mæst í æfingaleikjum og Ísland unnið í öll skiptin, sannfærandi.