Championship: Austin skaut West Brom aftur á toppinn

West Bromwich Albion er komið aftur á topp ensku Championship deildarinnar eftir sigur á útivelli gegn Preston North End.

Staðan var markalaus í bragðdaufum leik þar til Charlie Austin, sem kom inná sem varamaður á 75. mínútu, steig á vítapunktinn undir lok venjulegs leiktíma.

Declan Rudd, markvörður Preston, braut klaufalega af sér innan vítateigs. Þetta var þriðja tap Preston í röð en liðið er enn í umspilssæti, með 31 stig eftir 19 umferðir.

West Brom er með 42 stig á toppinum, tveimur stigum meira en Leeds. Þetta var fimmti sigur liðsins í röð.