Juventus og Napoli voru í harðri titilbaráttu og átti Juve erfiðan útileik gegn Inter á San Siro. Juve komst yfir snemma leiks og fékk Matias Vecino, leikmaður Inter, beint rautt spjald fyrir að traðka á Mario Mandzukic.

Í seinni hálfleik tókst heimamönnum að jafna og skömmu síðar átti Miralem Pjanic líklega að fá sitt annað gula spjald fyrir brot á Rafinha. Atvikið var skoðað með myndbandstækni og eftir samtal á milli Daniele Orsato dómara og VAR herbergisins var ákveðið að leyfa Pjanic að sleppa.

Inter komst í 2-1 en endaði á að tapa leiknum, 2-3, og var dómgæsla Orsato gagnrýnd harðlega.

„Dómgæsla Daniele Orsato í leik Inter-Juventus var upphafið á ágreiningi mínum við dómarasambandið. Mér höfðu borist ýmsar kvartanir vegna slakrar dómgæslu í leiknum og fannst því eðlilegt að opna rannsókn," sagði Pecoraro.

„Ég bað dómarasambandið og stjórn Serie A um að fá að hlusta á allar samræður sem áttu sér stað á milli dómarateymisins í leiknum. Það tók langan tíma og þurfti ég að reka mikið á eftir þessu en að lokum fékk ég gögnin send til mín, næstum hálfu ári síðar.

„Þegar gögnin bárust loks beið mín óvænt gjöf; það vantaði lítinn bút af hljóðskránni - partinn þegar Orsato tók ákvörðun um að reka Pjanic ekki af velli.

„Ástæðan? Mér var sagt að búturinn væri ekki þarna og þannig væri það bara. Við þurfum meira gagnsæi."