Toppslag Vals og Breiðabliks lauk með 2-2 jafntefli á Hlíðarenda í kvöld. Steini, þjálfari Breiðabliks, var nokkuð sáttur með stigið.
Lestu um leikinn: Valur 2 - 2 Breiðablik
"Þetta var hörkuleikur og ég er sáttur með stigið eftir að hafa lent 2 mörkum undir. Sáttur við spilamennskuna í seinni hálfleik og byrjunina í fyrri hálfleik en svo kom svolítið shaky kafli hjá okkur."
Blikastelpur voru miklu betri í seinni hálfleik en í þeim fyrri svo hálfleiksræða Steina virkaði greinilega.
"Mínar ræður eru nú aldrei merkilegar, en ég sagði þeim bara að halda áfram og halda hraða og tempói í leiknum og þá munum við skora."
Þegar Steini var spurður út í færanýtingu Blika á tímabilinu sem hefur á köflum verið slæm hafði hann þetta að segja:
"Auðvitað mætti færanýtingin stundum vera betri en þegar við erum duglegar við að skapa færi þá fara mörkin að mjatla."
Steini veit ekki hvort Breiðablik muni styrkja sig í glugganum.
"Það á eftir að koma í ljós. Meiðsli Fjollu hafa náttúrulega áhrif og Andrea Rán og Berglind Baldursdóttir fara til Bandaríkjanna. Svo við þurfum eitthvað að skoða þetta og tökum stöðuna á næstu dögum."
Athugasemdir