Jorge Sampaoli var rekinn sem þjálfari Argentínu eftir slakt gengi á heimsmeistaramótinu í Rússlandi. Lionel Scaloni og Pablo Aimar taka við af honum þar til réttur maður finnst til að taka starfið að sér.
Argentínumenn virkuðu ósannfærandi á mótinu og var Sampaoli kennt um enda virtist hann vera búinn að missa klefann áður en mótið byrjaði.
Scaloni og Aimar eru báðir ungir og nýlega búnir að leggja skóna á hilluna. Aimar á 52 landsleiki að baki en Scaloni lék aðeins sjö sinnum fyrir Argentínu.
Scaloni var aðstoðarþjálfari Sampaoli á meðan Aimar hefur stýrt U17 liði Argentínu síðasta árið.
Næsti leikur Argentínu er æfingaleikur gegn Gvatemala í Los Angeles sjöunda september og honum fylgir leikur gegn Kólumbíu í New Jersey þann ellefta.
„Við ætlum að taka okkur góðan tíma í að velja næsta þjálfara. Pablo og Lionel sjá um landsliðið á meðan," sagði Claudio Tapia, forseti argentínska knattspyrnusambandsins.
Athugasemdir