Mætir Manchester United eftir landsleikina
„Ég hef verið þarna í tvo mánuði og þetta hefur verið vonum framar. Þetta hefur verið æðislegt og mér líður fáránlega vel," sagði íslenski landsliðsmaðurinn Rúnar Már Sigurjónsson við Fótbolta.net í dag en hann samdi í sumar við Astana í Kasakstan.
Rúnar hefur verið öflugur í byrjun tímabils með Astana á dögunum en liðið komst í riðlakeppni Evrópudeildarinnar og fær það stórlið Manchester United í heimsókn. Rúnar hefur lengi verið stuðningsmaður United sem og fjölskylda hans.
„Vissulega er leikur 19. september á Old Trafford sem maður leit strax á þegar var dregið. Fjölskyldan er að missa sig yfir þessu núna en ég reyni að halda mér rólegum. Ég verð að fókusa á mig og þessa landsleiki svo ég geti haldist heill og spilað þarna eftir nokkrar vikur."
Astana er einnig með Partizan Belgrad og AZ Alkmaar í riðli. „Ég held að við eigum alveg séns í þessum riðli. Manchester United er topplið þarna en ég held að hin þrjú séu mjög svipuð. Við þurfum að gera heimavöllinn að vígi. Við þurfum að ná í stig þar og reyna að komast upp úr þessum riðli," sagði Rúnar.
Rúnar hefur verið í byrjunarliðinu í tveimur af fjórum leikjum hingað til í undankeppni EM. Hann er klár í leikina sem eru framundan gegn Moldavíu og Albaníu.
„Ég er klár eins og alltaf. Ég hef verið að spila þokkalega mikið með landsliðinu undanfarið ár. Ég veit ekkert hvort ég spila eða ekki en ég er klár og auðvitað vill maður alltaf spila. Síðan kemur það bara í ljós,"
Hér að ofan má sjá viðtalið í heild sinni.
Athugasemdir