Levante kom á óvart og lagði Barcelona að velli í gær, með þremur mörkum gegn einu. Lionel Messi kom Barca yfir í fyrri hálfleik en Jose Campana og félagar í Levante skoruðu þrjú mörk á innan við tíu mínútum í síðari hálfleik.
Campana skoraði eitt markanna og sagði hann eftir leikinn að hann og liðsfélagarnir hafi skoðað myndbönd af Marc-Andre ter Stegen, markverði Barca, fyrir leikinn.
„Ég vissi nákvæmlega hvert ég átti að skjóta þegar boltinn kom til mín. Við horfðum á myndbönd af honum í margar klukkustundir," sagði Campana eftir leikinn.
Ter Stegen er víða talinn sem einn af bestu markvörðum heims. Barcelona er áfram á toppi spænsku deildarinnar þrátt fyrir tapið.
Athugasemdir