Bayern hefur farið illa af stað á nýju tímabili og hefur framtíð Kovac verið mikið í umræðunni. Það voru óánægjuraddir á síðustu leiktíð og hafa þær orðið mun háværari á upphafi nýs tímabils.

Bayern tapaði 5-1 fyrir Eintracht Frankfurt í gær, gerði jafntefli við Augsburg á dögunum og tapaði einnig á heimavelli fyrir Hoffenheim. Liðið er í fjórða sæti þýsku deildarinnar, með 18 stig eftir 10 umferðir. Fjórum stigum eftir toppliði Borussia Mönchengladbach.

Þýskir fjölmiðlar töluðu um að framtíð Kovac yrði ákveðin eftir stórleikinn gegn Borussia Dortmund um næstu helgi en nú er orðrómur uppi um að hann gæti misst starf sitt í vikunni.

Tobias Altschäffl, ritstjóri hjá Bild, greindi frá þessu í gærkvöldi.