Það voru þrír leikir í 2. deild karla í kvöld. Deildin er orðin jafnari ef eitthvað er eftir úrslit kvöldsins.
ÍR tók á móti Dalvík/Reyni í mjög fjörugum leik. Axel Kári Vignisson kom ÍR-ingum yfir á 38. mínútu, en Spánverjinn Borja Lopez Laguna jafnaði fyrir Dalvík/Reyni stuttu fyrir leikhlé.
Borja Lopez var aftur á ferðinni snemma í seinni hálfleik er hann kom Dalvíkingum yfir. Már Viðarsson jafnaði fyrir ÍR stuttu eftir það og kom Viktor Örn Guðmundsson ÍR yfir á 83. mínútu. Frábært fyrir Viktor sem var að spila sinn fyrsta leik eftir langa fjarveru vegna meiðsla.
Eftir 16 mánaða fjarveru vegna hnémeiðsla sneri minn maður, @viktororn, aftur inn á völlinn í kvöld og setti eitt fyrir ÍR í jafntefli gegn Dalvík.😀
— Guðmundur Hilmarsson (@GummiHilmars) July 4, 2019
Því miður fyrir Viktor þá var þetta ekki sigurmarkið í dag. Borja Lopez fullkomnaði þrennu sína er hann jafnaði úr vítaspyrnu í uppbótartíma. Hann var aðeins með eitt mark í deildinni í átta leikjum fyrir leikinn í kvöld. Drama í Breiðholti og niðurstaðan 3-3 jafntefli.
Bæði lið eru með 12 stig í áttunda og níunda sæti. Þróttur Vogum fór upp fyrir Dalvík/Reyni og ÍR með góðum sigri gegn Víði á útivelli. Alexander Helgason, sem var að ganga í raðir Þróttar, skoraði eina markið í leiknum.
Víðir hefði með sigri farið upp fyrir Selfoss í öðru sæti deildarinnar, en liðið þarf að sætta sig við að vera áfram í þriðja sæti.
Kári vann þá öruggan sigur á Tindastól í uppgjöri neðstu tveggja liðanna. Guðfinnur Þór Leósson skoraði tvennu og voru Andri Júlíusson og Hilmar Halldórsson einnig á skotskónum.
Kári er í 11. sæti með 11 stig. Útlitið er ekki gott fyrir Tindastól, liðið á botninum með aðeins tvö stig.
Þess má geta að þegar tíunda umferðin er hálfnuð þá munar sex stigum á Kára, liðinu í 11. sæti, og Selfossi, liðinu í öðru sæti.
ÍR 3 - 3 Dalvík/Reynir
1-0 Axel Kári Vignisson ('38)
1-1 Borja Lopez Laguna ('44)
1-2 Borja Lopez Laguna ('46)
2-2 Már Viðarsson ('50)
3-2 Viktor Örn Guðmundsson ('83)
3-3 Borja Lopez Laguna ('90, víti)
Kári 4 - 0 Tindastóll
1-0 Guðfinnur Þór Leósson ('19)
2-0 Guðfinnur Þór Leósson ('40)
3-0 Andri Júlíusson ('44)
4-0 Hilmar Halldórsson ('75)
Víðir 0 - 1 Þróttur V.
0-1 Alexander Helgason ('45)
Markaskorarar af urslit.net
Athugasemdir