„Ég þurfti smá tíma í frí eftir það sem gekk á en ég hlakka til að byrja að spila aftur á laugardaginn," sagði Gary en hann mætir gömlu félögunum í KR í fyrsta leik sínum í Eyjum.

„Þetta verður spennandi. Ég átti góða tíma þar. Þetta verður erfitt, þeir eru besta liðið á landinu og við verðum að ná einhverju úr þessum leik. Þetta er heimaleikur og hópurinn okkar telur að við getum unnið heimaleiki og gert hvaða liði sem er erfitt fyrir."

ÍBV er í neðsta sæti Pepsi Max-deildarinnar með fimm stig en liðið er sex stigum frá öruggu sæti eftir tíu umferðir. Gary er viss um að liðið geti haldið sæti sínu í deildinni.

„Já, 100%. Miðað við það sem ég hef séð þá eigum við frábæra möguleika. VIð þurfum að hafa fyrir hlutunum og það er eðlilegt í þeirri stöðu sem við erum í. Við erum mjög vongóðir um að við getum haldið okkur uppi því við höfum gæði í hópnum," sagði Gary en hann hefur ekki sett sér nein markmið í markaskorun út tímabilið.

„Eina markmið mitt er að hjálpa ÍBV að halda sæti sínu í deildinni. Staðan hefur verið mjög skrýtin hjá mér svo ég vil byrja að spila aftur, leggja hart að mér og gera mitt besta til að passa upp á að við verðum áfram í Pepsi-deildinni."

Gary er í Draumaliðsdeild Eyjabita. Er hann í þínu liði?