Miðvörðurinn Arna Sif Ásgrímsdóttir átti nokkuð rólegan dag á skrifstofunni þegar Valur vann 3-0 sigur gegn Þór/KA í Bestu deild kvenna.
„Þetta var nokkuð þægilegt. Við eigum inni, við vorum ekki frábærar... maður hefði viljað fá aðeins meiri ákefð og gæði, en það er gott að taka þessi þrjú stig," sagði Arna í samtali við Fótbolta.net eftir leik.
„Þetta var nokkuð þægilegt. Við eigum inni, við vorum ekki frábærar... maður hefði viljað fá aðeins meiri ákefð og gæði, en það er gott að taka þessi þrjú stig," sagði Arna í samtali við Fótbolta.net eftir leik.
Lestu um leikinn: Valur 3 - 0 Þór/KA
Arna er uppalin í Þór/KA og hefur lengst af spilað með þeim á sínum ferli. Hvernig er það fyrir hana að spila á móti þeim?
„Það er alltaf skrítið. Þór/KA er uppeldisfélag mitt og fjölskylda mín, og allar þessar stelpur. Þór/KA á sérstakan stað í hjarta mínu og þetta er alltaf skrítið," segir Arna.
„En maður þarf að setja það í hausinn á sér að þetta er leikur eins og hver annar leikur. Núna er ég í Val og það er mitt lið. Mér er alveg sama á móti hverjum ég spila, ég ætla að vinna."
Valur er á toppnum, en Arna segir að Valsliðið eigi eitthvað inni. Sjálf hefur hún fengið mikið hrós fyrir sína frammistöðu í sumar og var mikið talað um að hún gerði sterkt tilkall til þess að vera í landsliðshópnum sem fór á Evrópumótið. Var hún svekkt að missa af því?
„Ef ég hefði átt skilið að vera í hópnum, þá hefði ég verið í honum. Svona er staðan. Við eigum frábært landslið og fullt af frábærum fótboltakonum. Það er ekki hægt að væla yfir því."
Allt viðtalið er hér að ofan en þar ræðir Arna um tímabilið og framhaldið.
Athugasemdir