Markverðir:

Hannes Þór Halldórsson (Qarabag)
Aðalmarkvörður Íslands hefur ekki spilað síðustu leiki fyrir nýja vinnuveitendur í Aserbaidsjan. Hannes hefur verið að glíma við nárameiðsli í nokkurn tíma.

Rúnar Alex Rúnarsson (Dijon)
Gekk í raðir Dijon í Frakklandi þar sem hann er aðalmarkvörður. Hann hefur fengið á sig þrjú mörk í fyrstu fjórum umferðum frönsku A-deildarinnar en liðið er í öðru sæti með 9 stig, þremur stigum frá PSG sem trónir á toppnum.

Frederik Schram (Roskilde)
Aðalmarkvörður neðsta liðs dönsku B-deildarinnar. Liðið er án sigurs eftir sjö umferðir og hefur fengið á sig fimmtán mörk.

Varnarmenn:

Birkir Már Sævarsson (Valur)
Lykilmaður í toppliði Pepsi-deildarinnar og hefur leikið virkilega vel sðustu vikur.

Ragnar Sigurðsson (Rostov)
Fagnaðarefni að hann haldi áfram með landsliðinu. Fastamaður í vörn Rostov sem er í þriðja sæti eftir sex umferðir í Rússlandi, þremur stigum frá toppnum. Liðið hefur aðeins fengið á sig tvö mörk.

Kári Árnason (Gençlerbirliği)
Fór í tyrknesku B-deildina en á enn eftir að leika sinn fyrsta deildarleik fyrir Gençlerbirliği. Liðið fer vel af stað og hefur unnið fyrstu fjóra leiki sína.

Ari Freyr Skúlason (Lokeren)
Lék þrjá fyrstu deildarleikina í Belgíu en hefur verið ónotaður varamaður í síðustu þremur leikjum.

Sverrir Ingi Ingason (Rostov)
Fastamaður í vörn Rostov sem er í þriðja sæti eftir sex umferðir í Rússlandi, þremur stigum frá toppnum. Liðið hefur aðeins fengið á sig tvö mörk.

Hörður Björgvin Magnússon (CSKA Moskva)
Byrjunarliðsmaður hjá nýju félagi, hefur spilað alla sex leiki liðsins til þessa en fór meiddur af velli í fyrri hálfleik í síðasta leik. Hefur ekki tekið fullan þátt í æfingum íslenska landsliðsins í vikunni samkvæmt frétt Vísis. CSKA er í sjötta sæti með níu stig í rússnesku deildinni.

Jón Guðni Fjóluson (Krasnodar)
Miðvörðurinn gekk í raðir Krasnodar í sumar en hefur verið ónotaður á bekknum. Liðið er í fimmta sæti í Rússlandi með tíu stig eftir sex umferðir.

Hólmar Örn Eyjólfsson (Levski Sofia)
Lykilmaður hjá Levski Sofia sem trónir á toppnum í Búlgaríu eftir sjö umferðir, með nítján stig.

Miðjumenn:

Gyfi Þór Sigurðsson (Everton)
Byrjunarliðsmaður hjá Everton í ensku úrvalsdeildinni og skærasta stjarna íslenska landsliðsins. Líklegur til að bera fyrirliðabandið í fjarveru Arons.

Emil Hallfreðsson (Frosinone)
Gekk í raðir nýliða í ítölsku A-deildinni en liðið er með eitt stig eftir þrjár umferðir. Meiddist í 2. umferð og var ekki í hóp um liðna helgi. Hefur ekki tekið fullan þátt í æfingum íslenska landsliðsins í vikunni samkvæmt frétt Vísis.

Guðmundur Þórarinsson (Norrköping)
Var ekki upphaflega í landsliðshópnum en var kallaður inn þar sem Emil er tæpur. Fastamaður í Svíþjóð þar sem hann er með eitt mark í nítján leikjum fyrir liðið sem situr í þriðja sæti.

Birkir Bjarnason (Aston Villa)
Hefur leikið í fjórum af sex leikjum Villa í Championship-deildinni ensku og skorað eitt mark. Eftir öfluga byrjun hefur Villa gefið eftir og sigið niður í tólfta sæti.

Arnór Ingvi Traustason (Malmö)
Byrjunarliðsmaður hjá Malmö sem er í fjórða sæti í Svíþjóð. Hefur skorað tvö mörk í fjórtán leikjum.

Rúrik Gíslason (Sandhausen)
Hefur spilað þrjá af fyrstu fjórum leikjum Sandhausen sem fer illa af stað í þýsku B-deildinni og er aðeins með eitt stig.

Rúnar Már Sigurjónsson (Grasshopper)
Var ekki í leikmannahópi Grasshopper í síðustu umferð í svissnesku deildinni en lék alla fimm leikina þar á undan. Hefur ekki tekið fullan þátt í æfingum íslenska landsliðsins í vikunni samkvæmt frétt Vísis.

Guðlaugur Victor Pálsson (FC Zurich)
Leikið alla sex leiki Zurich í svissnesku deildinni og fær nú tækifæri aftur í íslenska landsliðshópnum með nýjum þjálfurum.

Theodór Elmar Bjarnason (Elazigspor)
Var ekki upphaflega í landsliðshópnum en var kallaður inn vegna meiðsla Jóhanns Berg. Hefur spilað alla leiki Elazigspor í tyrknesku B-deildinni en liðið hefur farið illa af stað og er einungis með eitt stig.

Sóknarmenn:

Jón Daði Böðvarsson (Reading)
Er með þrjú mörk í fimm leikjum í Championship en Reading er í neðsta sæti með aðeins tvö stig eftir sex umferðir. Missti af síðasta leik vegna magvanda. Hefur ekki tekið fullan þátt í æfingum íslenska landsliðsins í vikunni samkvæmt frétt Vísis.

Kolbeinn Sigþórsson (Nantes)
Hefur ekki spilað aðalliðsleik síðan á EM 2016. Er að sögn heill í dag en er ekki í myndinni hjá félagsliði sínu i Frakklandi.

Björn Bergmann Sigurðarson (Rostov)
Er með þrjú mörk í sex leikjum fyrir Rostov sem er í þriðja sæti eftir sex umferðir í Rússlandi, þremur stigum frá toppnum. Hefur ekki tekið fullan þátt í æfingum íslenska landsliðsins í vikunni samkvæmt frétt Vísis.

Viðar Örn Kjartansson (Rostov)
Keyptur frá Maccabi Tel Aviv til Rostov í Rússlandi síðasta föstudag og er því fjórði Íslendingurinn í herbúðum félagsins. Væntanlega staðráðinn í að sanna sig fyrir nýjum landsliðsþjálfurum.