Kári Árnason, varnarmaður íslenska landsliðsins, var ánægður með að vera mættur út á grasið á Laugardalsvelli á æfingu í dag eftir að hafa leikið innandyra í Kórnum í síðasta leik með Víkingi R gegn HK.
„Þetta er aðeins annað. Það hlýtur að vera tekið fyrir þetta næsta sumar að spila innanhús. Það er mjög gott að vera kominn á gras," sagði Kári en hann skoraði tvö mörk í leiknum gegn HK.
Ísland vann Tyrkland og Albaníu í júní en nú eru framundan leikir við Moldavíu á laugardag og Albaníu á útivelli á þriðjudag.
„Við enduðum þetta mjög jákvætt í sumar. Við höfum venjulega náð í góð úrslit í sumarleikjunum og þetta var það sem við þurftum til að kickstarta þessum riðli almennilega. Engu að síður er mikil pressa núna. Við þurfum að halda áfram og vinna þessa tvo leiki, svo einfalt er það."
Moldavía er í 171. sæti á heimslistanum en Kári býst við erfiðum leik gegn þeim.
„Þetta eru strákar sem eru að spila í hörkudeildum. Þeir eru að spila í Ítalíu og Þýskalandi og hingað og þangað. Þetta eru fínustu leikmenn og þetta verður erfiður leikur. Þeir hafa veikleika eins og flest lið og við ætlum að reyna að nýta okkur þá og vinna þennan leik."
Það er nóg af áhugaverðum leikjum framundan hjá Kára því eftir landsleikina á laugardag og þriðjudag verður hann í eldlínunni með Víkingi í úrslitum Mjólkurbikarsins gegn FH laugardaginn 14. september. „Þetta er mjög spennandi vika. Þetta verður erfitt fyrir gamlan mann en við erum með frábært sjúkrateymi sem nær vonandi að hjálpa mér í því," sagði Kári.
Hér að ofan má sjá viðtalið í heild.
Athugasemdir