„Fyrsti mánuðurinn þarna hefur verið fínn. Ég er að spila og þeir hafa trú á mér," sagði framherjinn Viðar Örn Kjartansson við Fótbolta.net í dag en hann gekk í sumar til liðs við Rubin Kazan á láni frá Rostov.
Viðar Örn kom inn á sem varamaður gegn Andorra í mars og skoraði. Í júní byrjaði hann inn á sigrinum gegn Albaníu. Er hann bjartsýnn á að vera í byrjunarliðinu gegn Moldavíu á laugardaginn?
„Ég er alltaf klár í að byrja en við erum með frábæra framherja. Mér líður eins og ég sé aðeins nær liðinu en ég var. Frammistaða mín hefur batnað með árunum og ég er að spila meira. Ég er mun bjartsýnni núna en ég var fyrir einhverjum árum.".
Umtalaðasti Selfyssingurinn þessa dagana er fyrrum fótboltamaðurinn Valli Reynis en lag um hann hefur slegið í gegn að undanförnu. Valli er orðinn einn frægasti fótboltamaðurinn í sögu Selfyssinga þó ferli hans sé lokið fyrir löngu síðan.
„Hann á skilið að vera þarna. Það vissu ekki margir af honum fyrir utan Selfoss. Þetta er algjör kóngur. hann náði ekki alveg eins langt og hann hefði átt að ná (í fótboltanum) en þetta er toppmaður," sagði Viðar.
Hér að ofan má sjá viðtalið í heild sinni en þar talar Viðar meira um landsleikina framundan sem og lið Rubin Kazan.
Athugasemdir