Karlalandsliðið leikur vináttuleik gegn Katar 19. nóvember, en leikið verður í Eupen í Belgíu. Ísland leikur því tvo leiki í Belgíu í nóvember, en liðið mætir Belgíu í Þjóðadeild UEFA 15. nóvember.
Þetta verður í annað sinn sem Katar og Ísland mætast á fótboltavellinum en liðin gerðu 1-1 jafntefli 14. nóvember 2017 í Doha. Sá leikur var liður í undirbúningi liðsins fyrir HM 2018 í Rússlandi en Viðar Örn Kjartansson skoraði mark Íslands.
Katar er í fullri vinnu við að byggja upp lið fyrir HM 2022 sem verður haldið á þeirra heimavelli eins og allir fótboltaáhugamenn vita.
Næstu verkefni íslenska landsliðsins eru þó leikir gegn heimsmeisturum Frakka ytra 11. október og heimaleikur gegn Sviss þann 15. október. Leikurinn í Frakklandi er vináttulandsleikur en leikið verður gegn Sviss í Þjóðadeildinni. Ísland tapaði 6-0 fyrir Sviss í síðasta mánuði.
Á morgun verður fréttamannafundur þar sem Erik Hamren landsliðsþjálfari mun opinbera hópinn fyrir það verkefni.
Athugasemdir