Kulusevski klár í leikinn gegn Liverpool

Fabrizio Romano greinir frá því að sænski vængmaðurinn Dejan Kulusevski sé klár í slaginn aftur eftir meiðsli og verði með Tottenham í leiknum gegn Liverpool á sunnudaginn.

Hinn 22 ára gamli Kulusevski hefur ekki spilað síðan í september vegna meiðsla í læri.

Það eru gleðitíðindi fyrir Tottenham að endurheimta Kulusevski sem er á lánssamningi hjá félaginu en það hyggst kaupa hann alfarið á komandi ári.

Meiðsli hafa verið að hrjá sóknarlínu Tottenham að undanförnu. Richarlison er meiddur og Kóreumaðurinn Heung-min Son fór meiddur af velli í Meistaradeildinni í vikunni.

Son fór í aðgerð vegna beinbrots við vinstra auga en ekki liggur fyrir hvað hann verður lengi frá.