Topplið Manchester City reyndist of stór biti fyrir Watford er liðin mættust í síðasta leik kvöldsins í ensku úrvalsdeildinni.

Gestirnir frá Manchester voru betri í fyrri hálfleik og átti Ben Foster stórleik á milli stanganna hjá Watford.

Mark var búið að liggja í loftinu í einhvern tíma þegar fullkomin fyrirgjöf frá Riyad Mahrez rataði beint á Leroy Sane, sem kassaði boltann framhjá Foster.

Englandsmeistararnir verðskulduðu að vera marki yfir í hálfleik og tvöfölduðu þeir forystuna skömmu eftir leikhlé. Mahrez var þar á ferðinni þar sem hann kláraði nokkuð auðvelt færi eftir frábæran undirbúning frá Gabriel Jesus.

Heimamenn tóku við sér eftir seinna markið og voru mun hættulegri á síðasta hálftímanum en áttu erfitt með að koma knettinum í netið.

Abdoulaye Doucoure náði að minnka muninn á lokakafla leiksins þegar boltinn barst til hans eftir atgang í vítateig Man City.

Heimamenn lögðu allt í að reyna að jafna leikinn en meira var ekki skorað og Englandsmeistararnir búnir að vinna sinn sjöunda úrvalsdeildarleik í röð eftir jafnteflið gegn Liverpool.

Þess má geta að Sergio Agüero, Kevin De Bruyne og Raheem Sterling tóku ekki þátt í leiknum.