Englandsmeistararnir voru mun betri fyrsta klukkutíma leiksins og hefðu getað skorað fimm eða sex mörk ef ekki fyrir Ben Foster sem átti stórleik á milli stanganna hjá Watford.

Man City var tveimur mörkum yfir en heimamenn minnkuðu muninn undir lokin og settu toppliðið undir mikla pressu.

„Það er aldrei hægt að slaka á í úrvalsdeildinni, það er ekki nóg að vera 2-0 yfir. Maður þarf þriðja markið til að drepa leikinn," sagði Pep.

„Við vorum mikið betri aðilinn í dag en misstum næstum sigurinn niður. Þeir áttu fimm góðar mínútur í lokin og hefðu getað jafnað.

„Þetta snýst ekki um að bæta hin og þessi met, þetta snýst um að vinna leiki. Við unnum í dag. Það er ekki hægt að vinna alla 38 leiki tímabilsins auðveldlega."