„Ég hef líka áhuga á að spila með þriggja manna miðvarðalínu því við erum með mikið af miðvörðum en færri bakverði. Það er eitthvað sem ég er að hugsa núna," sagði Erik Hamren, landsliðsþjálfari Íslands, í viðtali við Stöð 2 fyrir mánuði síðan.

Svíinn vildi þó ekki fara strax í tilraunir með þriggja miðvarða kerfi í fyrstu tveimur leikjum sínum með Íslandi en spurning er hvort sú verði raunin í komandi landsleikjum.

Ísland er að fara að spila vináttulandsleik gegn Frakklandi 11. september og svo kemur leikur í Þjóðadeildinni gegn Sviss á Laugardalsvelli 15. september.

Ljóst er að Ísland mun falla úr A-deild Þjóðadeildarinnar og því verður fróðlegt að sjá hvort Hamren prófi þriggja miðvarða kerfi í komandi leikjum. 6-0 tapið gegn Sviss ytra ætti að ýta undir þær tilraunir.

Tómas Þór Þórðarson teflir fram hugsanlegu byrjunarliði Íslands í þriggja miðvarða kerfi á Twitter, í leikkerfinu 3-5-2.