Meinhard Olsen í leiknum í gær.
Færeyski miðvallarleikmaðurinn Meinhard Olsen spilaði með Fjölni í Bose mótinu í gær þegar liðið tapaði 0-1 fyrir Stjörnunni.
Olsen er tvítugur sóknarmiðjumaður og hefur leikið fyrir U17, U19 og U21 landslið Færeyja.
Hann er sem stendur hjá B36 í Þórshöfn en áður var hann í herbúðum Vendsyssel í Danmörku og lék með liðinu í B-deildinni.
„Þetta er ungur og efnilegur strákur í U21 árs liði Færeyja. Hann kom úr flugi í dag og var orðinn svolítið þreyttur þarna í lokin, en hann er markaskorari mikill og efnilegur drengur. Hann æfir með okkur út þessa viku og svo sjáum við til," sagði Ólafur Páll Snorrason, þjálfari Fjölnis, í viðtali eftir leikinn.
Ólafur segist sjá eiginleika í Olsen sem ættu að geta nýst Fjölnisliðinu en viðurkennir að hann hafi ekki náð að sýna sínar bestu hliðar í leiknum í gær en það sé eðlilegt enda hafi hann ekkert æft undanfarnar vikur.
Arnór Breki Ásþórsson lék einnig með Fjölni í gær en hann hefur æft með liðinu. Hann hefur þó ekki gengið frá samningi við Grafarvogsfélagið. Arnór Breki er 19 ára gamall vinstri bakvörður sem spilað hefur fyrir Aftureldingu.
Athugasemdir
