Jose Mourinho, stjóri Manchester United, gæti lent í vandræðum með að mynda öfluga miðju fyrir grannaslaginn gegn Manchester City á sunnudag.

Paul Pogba verður í banni í leiknum á sunnudag og þá eru Marouane Fellaini og Nemanja Matic meiddir.

Matic spilaði gegn Arsenal um helgina þrátt fyrir að vera tæpur vegna meiðsla. Serbinn er hins vegar óleikfær í dag eftir leik helgarinnar.

Matic verður ekki með gegn CSKA Moskvu í Meistaradeildinni í kvöld en hann gæti mögulega náð leiknum gegn City á sunnudag. Pogba spilar í kvöld enda gildir leikbann hans ekki í Meistaradeildinni.