Grindavík er með besta varnarlið Pepsi Max-deildarinnar hingað til. Liðið hefur aðeins fengið níu mörk á sig í fyrstu 11 leikjum sínum í deildinni.
Í gærkvöldi gerði Grindavík markalaust jaftefli gegn Stjörnunni á útivelli og það fjórða markalausa jafntefli Grindavíkur í deildinni í sumar.
Nánar má lesa um leikinn hérna, en Grindvíkingar telja sig hafa skorað löglegt mark í seinni hálfleiknum.
Eftir leikinn í gærkvöldi líkti Túfa liði Grindavíkur við Atletico Madrid, sem hefur verið eitt besta varnarlið heims undir stjórn Diego Simeone.
„Við erum Atletico Madrid íslensku deildarinnar. Við erum rosalega vel skipulagðir og menn eru ekkert að gefa eftir," sagði Túfa og bætti við: „Í mörgum af þessum 0-0 leikjum höfum við fengið góð færi til að vinna og fá fleiri stig."
Varnarleikurinn hefur verið frábær en sóknarleikurinn ekki upp á marga fiska. Grindavík var að bæta við sig spænskum sóknarmanni og vonast Túfa til að bæta við fleiri sóknarsinnuðum leikmönnum.
Viðtalið við Túfa er hér að neðan.
Athugasemdir