Beppe Marotta, framkvæmdastjóri Inter, staðfesti í viðtali að Mauro Icardi og Radja Nainggolan mega yfirgefa félagið í sumar. Þeir séu ekki í framtíðaráformum félagsins.
Icardi hefur verið fyrirliði Inter undanfarin misseri en lenti í útistöðum við félagið á nýliðnu tímabili.
Radja Nainggolan var keyptur síðasta sumar en hans krafta er ekki óskað lengur. Nainggolan er 31 árs og er sagður hafa neikvæð áhrif á samherja sína.
„Nainggolan og Icardi eru frábærir og gæðamiklir leikmenn en það nægir ekki eitt og sér. Þeir eru ekki í áformum okkar," sagði Marotta.
„Ég segi þetta með gagnsæi og virðingu: Icardi er til sölu. Við erum tilbúnir til að virða samninginn til enda."
Þetta þýðir að Icardi verður eflaust seldur í sumar. Það væri rándýrt fyrir Inter að borga honum áfram laun án þess að nota hann.
Athugasemdir