Sóknarmaðurinn Viðar Örn Kjartansson var í byrjunarliði Yeni Malatyaspor þegar liðið tapaði fyrir Ankaragucu í tyrknesku úrvalsdeildinni.
Eftir markalausan fyrri hálfleik missti Yeni Malatyaspor mann af velli með rautt spjald í byrjun þess seinni. Varnarmaðurinn Mustafa Akbas fékk beint rautt spjald.
Stuttu síðar var Viðar tekinn af velli, nánar tiltekið á 55. mínútu. Á 66. mínútu skoraði Dever Orgill eina mark leiksins fyrir Ankaragucu.
Yeni Malatyaspor er í tíunda sæti tyrknesku úrvalsdeildarinnar. Ankaragucu er áfram í fallsæti, en núna einu stigi frá öruggu sæti.
Þetta var annar leikur Viðars í Tyrklandi, en hann er þar á láni út tímabiilið frá Rostov í Rússlandi. Á síðasta ári fór Viðar til Rubin Kazan á láni en þeim lánssamningi var rift á dögunum. Hinn 29 ára gamli Viðar er nú mættur til Tyrklands en hann hefur á ferli sínum einnig leikið í Noregi, Svíþjóð, Kína og Ísrael.
Athugasemdir