Víkingur leikur í 1. deild kvenna næsta sumar.
Knattspyrnudeild Víkings Reykjavík hefur samið við þrjá nýja leikmenn um að spila með liðinu í 1. deild kvenna sumarið 2020.
Um er að ræða þær Höllu Margréti Hinriksdóttur, Telmu Sif Búadóttur og Dagný Rún Pétursdóttur.
Halla Margrét er 25 ára markvörður uppalin í Aftureldingu. Halla var leikmaður HK/Víkings 2019 og stóð í marki liðsins fyrstu leikina í Pepsi-Max deildinni síðasta sumar áður en hún puttabrotnaði. Halla spilaði samt sem áður stórt hlutverk í liði HK/Víkings í fyrra og er komin til baka úr meiðslum.
Halla hefur spilað 50 meistaraflokksleiki með, ásamt HK/Víking, Breiðablik, ÍA og Aftureldingu. Þá á hún 8 leiki fyrir U19 ára landslið Íslands.
Telma Sif er 19 ára miðjumaður sem kom til Víkings frá Val núna í haust. Telma hefur spilað 16 meistaraflokksleiki með KH og ÍR í 1. deild kvenna.
Dagný Rún er 16 ára og kemur til Víkings frá HK. Dagný á að baki 13 meistaraflokksleiki þrátt fyrir ungan aldur enda virkilega efnilegur leikmaður sem vert er að fylgjast með. Dagný spilaði sjö leiki með HK/Víking í Pepsi Max-deildinni á síðasta ári.
„Knattspyrnudeild Víkings væntir mikils af þessum glæsilegu leikmönnum og lýsir yfir mikilli ánægju yfir þessum undirskriftum," segir í tilkynningu frá Víkingi.
HK og Víkingur ákváðu að slíta samstarfi eftir síðasta tímabil og mun Víkingur taka sæti liðsins í 1. deild. HK er í 2. deild.
Athugasemdir
