Lokaleikur dagsins í þýsku Bundesliga fór fram á Borussia-Park í Mönchengladbach í kvöld. Þar mætti Dortmund í heimsókn.

Gestirnir komust yfir á 8. mínútu þegar Thorgan Hazard skoraði eftri stoðsendingu frá Erling Braut Haaland. Lars Stindl jafnaði leikinn fyrir heimamenn á 50. mínútu en það var svo Hakimi sem tryggði gestunum stigin þrjú eftir sendingu frá Jadon Sancho.

Þetta var fimmti sigur Dortmund í röð í öllum keppnum og sá áttundi í tíu leikjum. Haaland, sem hefur verið iðinn við kolann hjá Dortmund, fékk gott færi á 86. mínútu en skaut yfir mark heimamanna.

Gladbach sem var á tímabili á toppi deildarinnar er nú sex stigum frá toppsætinu en Bayern sem þar situr á leik til góða sem fer fram á morgun.

Andri Rúnar kom við sögu
Í þriðju efstu deild var Andri Rúnar Bjarnason mættur aftur í leikmannahóp Kaiserslautern eftir fjarveru.

Andri Rúnar lék síðustu mínúturnar í 3-3 jafntefli gegn Meppen. Kaiserslautern er í 14. sæti deildarinnar.

Andri hafði ekki verið í hópnum í síðustu þremur leikjum og hefur verið mikið inn og út úr hóp eftir áramót.