Rúnar Kristinsson Þjálfari KR gat fagnað öðrum titli sínum með KR á undirbúningstímabilinu í kvöld þegar KRingar tryggðu sér Lengjubikarinn með sigri á ÍA Í úrslitaleik á Eimskipsvellinum í Laugardal í kvöld.
Lestu um leikinn: ÍA 1 - 2 KR
„Þokkalega sáttur. Þetta var nú ekki besti fótboltaleikurinn svona ef maður horfir á það en það var hraði i báðar áttir, mikið af löngum boltum og hörkuleikur og mikil barátta.“
Sagði Rúnar aðspurður um hvort hann væri sáttur við spilamennsku sinna manna í kvöld.
Nokkrir leikmenn voru fjarverandi úr leikmannahópi KR í kvöld og lék því fréttaritara forvitni á að vita hver staðan væri á leikmannahóp KR nú þegar rétt tæpar 3 vikur eru í mót.
„Staðan mætti nú vera örlítið betri. Skúli Jón er meiddur og er frá og Kennie líka, Kristinn Jónsson er búinn að vera frá og Arnþór er að koma til baka núna eftir meiðsli og er byrjaður að spila sínar fyrstu mínútur þannig að þetta er svona allt í rétta átt og ég reikna með að þessir menn verði klárir þegar mótið hefst.“
Í leikslok lenti Rúnar í smá orðaskaki við Lars Marcus Johansson leikmann ÍA. Vildi hann eitthvað tjá sig um það?
„Það var smá hiti þarna í lokinn og menn voru eitthvað að æsa sig og við létum hvorn annan heyra það en við áttum síðan bara gott spjall nokkrum mínútum seinna þegar menn eru búnir að róa sig og gengum báðir sáttir frá borði.“
Sagði Rúnar Kristinsson þjálfari nýkrýndra Lengjubikarmeistara KR en nánar er rætt við hann í spilaranum hér að ofan.
Athugasemdir