Sveinn Aron Guðjohnsen var í byrjunarliði Spezia í dag í æfingaleik gegn ítalska úrvalsdeildarliðinu Sampdoria.
Sveinn gerði sér lítið fyrir og skoraði, en hann jafnaði metin í 1-1 á 15. mínútu leiksins eftir að Federico Bonazzoli hafði komið Sampdoria yfir stuttu áður.
Staðan var 2-1 fyrir Sampdoria í hálfleik, en leiknum lyktaði með öruggum 5-2 sigri Sampdoria.
Sampdoria endaði í níunda sæti Seríu A á síðasta tímabili. Spezia er í næst efstu deild.
Sveinn Aron, sem er fyrrum leikmaður HK, Vals og Breiðabliks, spilaði seinni hluta síðustu leiktíðar á láni hjá Ravenna í C-deildinni á Ítalíu. Sveinn Aron er 21 árs.
Keppni í ítölsku B-deildinni hefst þann 24. ágúst næstkomandi.
Athugasemdir