Ásgerður Stefanía Baldursdóttir, fyrirliði Stjörnunnar í Pepsi-deild kvenna, mun róa á önnur mið á næstu vikum en Morgunblaðið greinir frá þessu í dag.
Ásgerður varð samningslaus í síðasta mánuði og hún mun ekki gera nýjan samning við Stjörnuna.
„Ég hef ekki rætt formlega við önnur lið. Ég vildi klára mín mál hjá Stjörnunni áður en ég færi í einhverjar viðræður en það hafa einhverjar þreifingar átt sér stað, undanfarna daga. Þetta er allt í lausu lofti hjá mér eins og staðan er í dag en ég vil ekki útiloka neitt. Ég get alla vega lofað þér því að ég er ekki að fara leggja skóna á hilluna,“ sagði Ásgerður við mbl.is.
Ásgerður er uppalin í Breiðabliki en hún gekk í raðir Stjörnunnar árið 2005. Þessi 31 árs gamli leikmaður hefur fjórum sinnum orðið Íslandsmeistari með Stjörnunni og þrisvar bikarmeistari.
Athugasemdir